A luancia February 9 ah Naypyidaw khua ralkap council duhlonak langhter tu lakah ai tel ve mi kum 20 hngakchia nu te cu palik nih a lu ah meithal in an rak kah i, nihin February 19 zing 11:00 AM ah a nunnak a liam cang tiah theih a si.
Mya Thwe Thwe Khaing hi meithal in kah a ton hnu ah Naypidaw siizung ihkhun 1000 tlum ah an chiah i, a luthluak chung ah kuanfang a luh ruang ah a thluak a thi (brain dead) mi a si. A thluak a thi ko nain thaw an pek mi oxygen in a thaw a chuah rih ca ah ruahchannak a um hnga maw tiah an hngah nain ruahchannak a um tilo ca ah a chungkhar nih oxygen hri phelh ding ah an lung a tling i, Tuzing suimilam 11:00 am ahkhan a chungkhar hnatlaknak in a thaw an dihter.
Mya Thwe Thwe Khaing ruak cu suimilam 12:00 hrawng ahkhan tikhal kuang in an chuahpi i, siizung leng ah an chuahpi cang. A ruak thlahnak ca ah Komiti pakhat an ser i, Phone in pehtlaih i zeitik ah a ruak khangh/vui a si lai ti mi kha mipi nih an hngalh khawh nak hnga thanh le hal khawh a si telai tiah an chim.
Mya Thwe Thwe Khaing cu 2021 ralkap uknak chuh ruang ah duhlonak alanghter tu hna mipi chung in nunnak a pe hmasabik mi a si. A mah hi tanghra a si i, unau pali a ngei mi a si tiah theih a si. Mya Thwe Thwe Khaing ruak khangh/vuinak kong ah Komiti nih thawngfiang an thanh telai tiah theih a si.
Mah Mya Thwe Thwe Khaing thihnak kong he pehtlai in Ralkap Council nih thawngfianhnak an tuah mi chung in General Zaw Min Htun nih meithal hliam hma a si ko i, cu kong he pehtlai in hlathlainak kan tuah cuahmah ko tiah a chim.
Source: BBC
