2020 thimnak ah meepe tu mipi hna ca ah fimchim tu tiin tuahmi mVoter 2020 timi Application pakhat a chuak. Hi Application ah MP ai cuh tu hna i Miphun le Biaknak timi telh chih ding a ummi cu Justice For Myanmar timi phu nih a rannak in hnawh ding ah an hal colh.
Thim dingmi Palai hna i an Miphun le an Biaknak, a nu le an pa an telh chih mi ruang ah miphun kar buainak a chuak kho mi a si tiah rianrang tein hnawh ding ah an hal nak hi a si. mVoter 2020 timi Application hi Myanmar mipi ca ah ramdang nih fund an pek mi phaisa hmang in mee petu ding mipi hna ca ah fimchimhnak a tuah tu an si.
Myanmar ramkomh chungah Rohingya miphun pawl kong he pehtlai in hi Application hi namnehnak a um lai timi ruangah bawmhnak a tuahtu EU, IDEA le Asia Foundation zong Justice For Myanmar nih a mawhchiat hna.
“A ngaingai ti ah cun Palai hna i, an background chim tikah Miphun le Biaknak siloin an riantuan khawhnak, ramkhel rian an luhnak kong tu hna hi langhter deuh ding a si. mVoter 2020 Application nih mipi nih an herh taktak mi information pe loin, Miphun kong, biaknak kong tibantuk a pek hna tikah miphun kar, biaknak kar buainak a chuahter kho mi thil a si” tiah Justice For Myanmar chimrelnak nawlngeitu Yadana Aung nih a chim.
mVoter 2020 Application ahhin ramchung ah thimnak alut dingmi palai 6966 hna i, a hmanthlak, an umnak party 92 le an sining pawl a langhter dih. Justice For Myanmar phu hi ram mipi ca ah tlukruannak le tuanvo ngeihnak kong a chimrel i, Federal ramkomh ser khawhnak ding ca ah le Tatmadaw sipuazi makter ding ca ah a hal cuahmah mi phu an si.
Source: Mizzima
