CBN News, 19 Oct 2020: New Zealand Prime Minister Jacinda Ardern le a party, Labour Party nih zarhteni New Zealand ram cozah i thimnak ah landslide in teinak an hmuh.
17 Oct 2020 ah khan seat 120 umnak, New Zealand House of Representative election ngeih a si i New Zealand ram ramkhel party 17 nih an i cuh, cozah tlaitu Labour party nih seat 64 an lâk, vote tla mi vialte lak ah 49% an hmuh.
An mah dohtu oposition party nganbik National Party nih vote 27% an hmuh tiah Election commission nih an langhter.
New Zealand election ah cozah ser dingin seat 61 hmuh a hau, Labour Party nih seat 64 an hmuh ruangah an Party pumpak in cozah an ser khawh.
Covid-19 pulhrai dohnak ah Prime Minister Ardern le a party an cawlcangh a thawng, hi ruangah election hlan in Labour Party nih teinak an hmuh zumh cia a rak si.
PM Ardern hi kan hnung kum Christ Church i Mosque muslim thlacam lio meithal kahnak a can hnu i pumpak meithal ngeih khapnak nawlbia a renghnak le Covid-19 a dohnak kong ah New Zealand ram mipi lawng silo in Vawleicung ram hruaitu hna nih an thangthatmi nusal pakhat a si.
New Zealand ah hin Covid-19 positive minung 1,500 hrawng an um i Covid-19 ruangi a thi mi minung 25 lawng an si.
Labour Party hi Kum 1996 hnu Proportional voting system hman a si hnu ah party pumpak in seat ngah tambik le Party pumpak i cozah serkho party hmaisa bik a si. Election hmaisa ah khan Labour party nih Green party le Nationalist New Zealand First party hna tuantipi nakin cozah an rak ser.
Teinak an ngah hnu ah Auckland i an party tanhtu mipi hmai i PM Ardern nih bia a chimning ah New Zealand ram economy thanchohter a silai i mipi caah rian tuantu kan silai, rian a tam khawhchung kan ser lai i mipi training tha te in pek an silai, pakhat le pakhat karlak ah i tluktlannak a um lai tiah a chim.
Kum 40 telawng a sirih mi Ardern cu opposition party hruaitu hna pin ah Vawleicung ram hruaitu hna nih lawmhpinak caa an kuat.
An rak i tinh ning ah New Zealand cozah thimnak cu September ni 19 ah khan ngei dingin timh lamhnak an rak ngei, asinain Covid-19 ruangah election caan hi thawn a si.
CBN News
