Chin ram ah a tam bik cin mi Zawngtah cu a hlan ah Sagaing ramthen Tamu in India ram Manipur State Moreh ah rak kuat tawn a si nain tukum ah cun Tamu in Moreh lei ah kuat khawh a si ti lo caah Zawngtah hna cu a man tlawm te in zuar a si kong Zawngtah cing tu hna nih an chim.
“Tukum cu a man a tla tak tak si,kan inn i kan cin mi zawngtah hna cu kawngkhat ah fangkul lawng kan hmuh,nikum ah cun kawngkhat ah 80 silo 100 hrawng kan rak hmuh tawn” tiah Zawngtah cingtu pakhat nih Zalen ah a chim.
Kumdang ah cun zawngtah hi kawngkhat ah kyats 80 in 200 kar tiang a rak phan nain tukum ah cun kawngkhat ah fangkul kyat 20 in 60 kar lawng a phan.
“kumdang ah cun Tamu in Moreh lei ah ka kuat tawn.a hlan ah cun aman fak deuh in an kan zuar khawh ve caah fak deuh in kan rak cawk ve.a tu cu Moreh lei an phih cang caah Tio in Mizoram lei ah kan kuat.a man zong a hlan bantuk in kan hmu kho ti lo” tiah Zawngtah in chawlehnak a tuah tu nih a chim ve.
Zawngtah hi a hlan ah cun Manipur ram Meitei miphun hna nih rak cawk deuh mi a si i a tu ah cun an ram ah miphun kar buaibainak a chuah ve caah Tamu-Moreh ramri gate cu thil luhchuak ter tik ah phihkhar mi hna a vung um tiah theih a si.
