Kokang ralkap Myanmar National Democratic Aliance Army – MNDAA hruaitu Peng Daxun cu Tuluk cozah nih an tlaih i Myanmar ram ah kir nak nawl an pe ti lo tiah Myanmar Now nih a langhter.
MNDAA ralkap a rak dirh tu Pheung Kya – Shin fapa a tu i MNDAA hruaitu Pheung Daxun kum 59 cu Special Representative for East Asia of the Chinese Foreign Ministry Deng Xijun he ton awk ah kan hnu thla dongh lei ah khan Yunnan province ah a kal i a tu bantuk in an tlaih hi a si.
Cu tonnak a dih cun Pheung Daxun cu Myanmar lei ah kirnak nawl pe ti lo in an hren hi a si. Pheung Daxun Myanmar ram ah a rak kir ti lo nak cu Yunnan ah sii-ai lei ai thlopbul caah a si tiah thawng a leng nain a tak ah cun Tuluk cozah nih an rak hren bia a si.
MNDAA ralkap hna cu 2023 October thla le tukum August thla hna ah 1027 operation an rak kalpi i Shan ram chaklei i khuapi a si mi hna Laukkaing , Chin Shwe Haw hna telh in SAC sakhaan lianbik um nak Lashio khuapi hna an laak.
Tuluk cozah nih a duh ning ah cun MNDAA nih a laak cia mi Lashio khuapi cu chuahtaak hna seh ti hi a si. MNDAA hruaitu nih cun ka nunnak hi an laak si la ko hna seh law Lashio khuapi cu rak chuahtaak hlah uh tiah a ralkap bawi sinah bia a cah hna nain MNDAA ralbawi hna nih an pu nunnak sungh ding an duh lo lai caah Lashio khuapi hi zeitik caan poahah an chuah pi khawh te men tiah ramkhel lei thiam sang hna nih an chim.
