Mizoram chung i aa dor cuahmah mi Myanmar,Bangladesh le Manipur ralzam hna zohkhenh khawh nak ding ah Mizoram chung ah UNICEF zung hun/on piak dingin Mizoram MP Pu K. Vanlalvena nih rian ngeitu sin ah nihin October 29 ah a hal.
Rajya Sabha MP Pu K.Vanlalvena cu Chin Kumthar hmang ding in New York a phak lio a si i cu pah cun New York ah a um mi United States of America Department of State Officer, East Asia, South East Asia and Pacific region rian ngeitu a si mi Erin Kimsey he tonnak a ngeih i a tu bantuk in a hal hi a si.
Pu K. Vanlalvena nih cun Mizoram chung ah hin kan innpa ram a si mi Myanmar, Bangladesh le Manipur hna ah an ram a buai caah Mizoram an hun kan fuh i cu hna lak ah ngakchia kum tling lo zong an tam ngai a ti. Cu ngakchia hna nih cawnnak tha,Eidin tha, Sii-ai tha ,a thiang hlim mi fenhaih le a thianghlim mi inn an ngei lo i an herh ngai a ti.
Cu bantuk ralzam hna harnak cu kan nih Mizoram nih bawmhchanh awk ah a har ngai caah a rannak in Mizoram chung ah UNICEF zung hun/on a herh i hun/on a si khawh nak hnga kan tawlrel piak tiin a hal.
A tu bantuk in Pu K. Vanlalvena nih a hal mi hi a biapi taktak mi a si i US cozah nih Chin ralzam bawmhnak a pek hnik mi million tampi zong cuka cun a lut kho mi a si tiin Pu Zo Tum Hmung nih Lawngtlai ralzam hna he tonnak a ngeih lio ah a rak chim.
Mizoram ah hin Myanmar ram in ralzam 34,000 deng, Bangladesh in minung 2,000 tluk le Manipur in minung 12,000 an i dor lio i India cozah pi nih cun 1951 lio i UN refugee convention ah min a rak thut ve lo le 1967 i protocol ah min a rak thut ve lo caah phungning in ralzam a co hlang lo i Mizoram cozah nih kan unau an si hna tiah an kan cohlan khi a si.
