CBN News, 14 Oct 2020: Mizoram le Assam ramkulh, ramri i cuh buainak cu zualhmat lei a panh chin lengmang, ramri ah Mizo ralkap zeimawzat meithal he ralring te in duty ter an si i, a herh ah cun meithal kap cawlh dingin nawl pek an si cang.
Mizoram le Assam ramkulh hi aitlaimi an si nain ramri felfai tein khiahpiak an si loh, Mizoram le Assam ramkulh i ritnak cu ‘Inner Line Reserve Area’ tiah ramri thenpiak lo in chiahpiak an si i Mizo an si zongah Assam mi an si zongah duh paoh in cu ka ram cu tongh khawh a silo.
Hi ramri he pehtlaiin caan saupi buainak an rak ngei cang, Assam nih an mah ram kulh chung bantuk in tuahto an timh i Mizo pawl nih an duh velo ruangah kum 2019 ah khan fak ngaiin an rak buai i ramri ah thisen tiang an i chuahnak kha a si.
Nai zarh hrawng ah Assam ralkap pawl ramri ah an i chawh len hmuh a si i ramri kiang Mizo thlam sakmi hna an rak khangh piak, hi kong he pehtlai in Mizoram nawlngeitu hna nih Assam ralkap cu zoh sawh an tim tilo i a herh ah cun ramri ah ral i tu cawlh dingin tiah Mizo ralkap zei mawzat ramri ah an thlah ve.
Nizan ah khan Assam ralkap motor 2 cu ramri lei panh in an rat hmuh a si. Mizo ralkap nih ralring te in meithal nih an rak tin cia hna i kah an rak timh, ramri an naih an cun kap cawlh dingin nawl pek an si. Assam ralkap nih Mizo ralkap meithal he rak duty mi cu an hmuh tik ah hmai lei panh tilo in an kir than tiah Ramri Duty pawl nih an chim.
Ramri ah hin Mizo ralkap pawlcu zeitik caan paoh ah ralring te in um peng dingin theihter an si i Assam palik le ralkap nih ramri an vun naih ah cun rak kap cawlh dingin nawl pek an si.
CBN News
