CBN News, 18 Oct 2020: Mizoram le Assam ramri kong buainak cu cuhlan nakin linhsat lei a panh deuh deuh, Nizan 17 Oct 2020 zan tiang ah Assam civil mi le Mizo civil mi karlak ah thisen i chuahnak tiangin a cang.
Nizan le tuni (17-18, Oct) tiang Assam le Mizo buainak thawngpang:
Tuzarh zarh hramthawk ah khan Assam palik hna nih Mizoram ramri i mizo thlam an khangh piak hnu ah Mizoram lei in ramri vengtu ralkap meithal he zei mawzat an zuang, Assam palik hna nih ramri ah buainak an tuah ah cun kap colh dingin nawl pek an rak si.
Assam lei in thawngpang a daih ruangah zarh dongh lei ah Mizo ralkap pawl cu ramri in an tlung i minung pa 4 pa 5 hrawng lawng meithal he an duty.
Hi lio ah Assam lei in Civil mi zei mawzat nih Mizo duty pawl cu an va zuan hnawh i ramri ah buk an sak mi zeimaw zat an khangh piak hna, Civil mi kahnak nawl an ngeih lo ruangah Mizo palik pawl an cawlcang kho loh tiah CBN nih thawng kan theih.
CBN nih report kan theihchap ning ah Nizan zanlei sang ah khan ramri kiangi a um mi mizo tlawmpal hna thinhang in Assam kala pawl cu thingtan le namtong he an va zuan hnawh ve hna, Assam kala pawl nih Mizo pa pakhat a hngawng ah namtong in an rak sat i Sizung lei ah an tehpi colh.
lampi ah a thi tiah thawng a thang manh nain a thi deuh lo, a nung rih ko tiah a timi zong an um.
Cu thawng cu Social Media (Facebook le Whatapp) ah a thang colh, Mizo mipi thin hang in ramri pawng Mizo khua mipi hna nih an va zuan hnawh hna, Assam kala pawl cu khua ah an zam, Mizo pawl nih an khua ah an va luh hnawh hna i a phek buai in an buai, Mizo pathum fak ngai in hliam an tong, Assam leimi zong zeimaw zat thisen a luang ve tiah kan theih.
Hi Buainak a linhsat thawng cu Aizawl lei an thanh colh i Aizawl lei in mino hruaitu zeimawzat ramri ah an va zuang, Mizo sianghngakchia bu MZP hna nih ramri kiang, Mizoram chung i Kala pawl inn/dawr an hmuh mi paoh an khangh piak thluahmah, inn/Dawr 10 hrawng an khangh manh tiah kan theih.
Hi buainak a linh silin lio ah hin Assam lei in siseh, Mizo lei in siseh Palik an i telh moih lo tiah kan theih.
Zahan zan zantim laifang hrawng ah khan hi buainak hi ziam lei a panh, tuzing zarhpini Zingka ah Aizawl lei in MNF hruaitu le Mizo mino zei mawzat ramri ah an zuang than, ramri ah Assam thawngpang a dai.
Tuchun zarhpini chun laifang tiangi thawng kan theih ningah khat talei khat talei in palik meithal he timhlamh nak an ngei cuahmah tiah khan theih, hi lio ah Aizawl le Mizoram khuate cheukhat ah mino zeimawzat meithal a ngeilo mi namtong le thingtan he Ramri ah Vulenteer (pumpek) in Border security ah an i pe tiah kan theih.
Mizoram, Assam ramkulh lei khuate ah a ummi kala pawl cu Mizo mipi thinhannak an tih ruangah ramtang ah an zam dih tiah kan theih, khaw dang zongah khuachung ah kala pawl lengchuak ngam an um lo tiah kan theih chap.
CBN News
