2022 January thla chung ah Chin ramkulh Matupi peng tualchung mi 10 tuksum in a rak that tu SAC ralhraang hna hruaitu Major Soe Win Htaik cu nizan November 24 Lailenpi sakhaan laak kahdohnak ah a thi tiah theih a si.
A Luancia kum 2022, January thla ah Major Soe Win Htaik hruai mi ralhraang hna cu Matupi khua in Rezua khua lei an kal pah ah Matupi peng,Ngalai khuate,Ki-Hlung khuate,Ka-Se khuate,Saung-Thia khuate,Ti-paw khuate le Lung-Hlaw khuate hna in kum tlinglo ngakchia pakhat telh in sualnak ngeilo tualchung mi 10 cu tuksum in an rak thah hna caah cuka khuami hna cu an zapi in Mizoram lei ah an rak zam hna.culio i a rak zam mi hna cu a tu tiang khua ah an kir kho rih lo tiah theih a si.
Lailenpi Khua SAC sakhaan an laak hnu ah CNA le CDF ttangti phu hna nih hmum thianh hlimh nak an tuah nak ah a tu bantuk in Major Soe Win Htaik ruak an hmuh hi a si.
“Matupi peng tualchung mi a that tu hna ralhraang phu hruaitu Matupi hrambumh Infantry Battalion 304 in deputy commander Major Soe Win Htaik kha a si ko. A mah nih hruai in ralhmai a nor pi mi hna a si.sualnak ngei lo mizapi tuksum in a rak that tu hna i nawl pe tu pa kha a si ko” tiah Chin Human right Organization in File Director nih Ayeyarwaddy Times ah a chim.
Cu leng ah Major Soe Win Htaik cu Lailenpi a phak hnu ah Lailenpi khua chung ah zapi dawr ah a man pek lo in duhpoh in thil a laak tawn i Matupi peng chung ah zapi inn hna boh in a kuttang minung hna thil a fir ter tawn tu a si tiah theih a si.
