Chin ramkulh thlanglei Matupi khua ah facang a phanh tilo caah khuami hna eidin kong ah harnak fakpi an tong hna tiah theih a si.
“Matupi khuami hna cu eidin kong ah harnak fakpi kan tong ko,ei awk um bak lo dir hmun kan phan cang,SAC nih kham ning phun 4 (ဖြတ်(၄) ဖြတ်) a tuah caah a si.Phone cu chawnh khawh a si ko nain Facang,Chiti,Cite le Ngapih hna zei hmanh a phan kho ti lo” tiah Khonumthung ah a chim.
A luancia thla thum tluk khan SAC nih Matupi khua lutchuak tawnmi thil phor mawtaw lian cu luh a sian ti lo caah a tu ah facang tun khat ah Kyats 180,000 a si i cu hmanh cu cawk awk a um tuk tilo tiah theih a si.
Matupi khuanu khuapa hna nih SAC sin ah nawlnak an va tuah caah SAC nih thilphor motor luh a sianh than hna nain dothlennak ralkap hna nih Mindat-Matupi lam an phih caah facang phor tu hna motor a luh khawh lo hi a si tiah khuami pakhat nih a chim.
“SAC nih ah kan nawl hna caah motor luh ding in an kan sanh ko nain CDF hna nih Mindat-Matupi lampi meng 84 zawn ah facang phor tu hna cu an dir ter hna i an facang an thumh ter viar hna” tiah khua upa pakhat nih a chim.
A tu ah Matupi khuachung khuasa mi hna cu Kawlrawn lei in facang a lut ding a um tilo caah khuate lei in facang cawk cio a si i a hlan pungkhat ah Kyats 40,000 in cawk tawn mi facang cu a tu ah kyat 70,000 in cawk a si cang tiah theih a si.
