Chin ramkulh Paletwa peng Mara ram chung ah a chuak cuahmah mi Chin Hriamtlai karlak kahdohnak ah kan i tel ve lo tiah AA chim phuan nak nawl ngeitu Khaing Thu Kha nih nihin media he ton biaruah nak ah a chim.
“Hi buaibai nak chung ah bawmh chanh nak zei hmanh kan tuah lo timi hi fek tein chim ka duh, hi buai nak cu an mah Mara le Mara kar buainak a si i a tak tak ah thazaang pek le kah bawmh ti bantuk zei hmanh kan tuah lo timi cu fek tein ka chim ngam” tiah a chim.
Mara ramchung kahdohnak ah AA an i tel timi cu biavaivuan a si i ram khel kong ah namneh a kan duh tu nih an chim mi bia a si a ti i kan ralpi a si mi SAC doh cuahmah lio ah a tu bantuk miphun pakhat le pakhat kar a chuak mi buaibainak cu thazaang kan pe lo tiah a chim chih.
Mara ram chung ah hin aluancia January 24 thok khan Chinland Council ralkap a si mi CNA,CDF-Mara hna le MDF/MEC hna karlak ah kahdohnak fak piin a chuak i kaphnih kar thi le hliam zong an um.
Mara ram chung i khuate khua 8 tluk ah kahdohnak a chuah hi a si mi cheukhat khua hna cu inn le lo a rawk mi zong an um len kong theih a si.
