Myanmar ramchung buai ruangah India ram Manipur ramkulh ah himnak kawl in ral a zaam mi minung 200 leng cu thong an rak thlak hna i tutiang in an chuak kho rih hna lo tiah theih a si.
Manipur palek nih zaangfahnak nei lo in an tlaih hna i taza an cuai thluahmah mi Myanmar mi minung 55 cu Imphal thonginn ah an um ko rih hna, a dang minung 150 renglo cu Lam Kaa thonginn ah an um ko rih hna tiah theih a si.
Thongchung ahhin a chuak ka mi bawhte telh in kum 18 tang minung 30 an um. Nu lawngte minung 48 an um ve. Cun thla 5 thongthlak le Rupee 1000 liam seh tiah sual an phawt mi pa lawngte minung 25, nu 55, an dihlak minung 80 hna cu sual a phawt mi hna thla 5 thong le tangka 1000 zong an pek cang ko nain an chuah duh hlei hna lo tiah ralzaam a bawmtu hna nih an langhter.
Kan hnu te ah Manipur sihni pawl India tangka Sing 3 an pek hna hnu ah thonginn in an chuah mi hna nih Manipur thong ah an harsatnak a chim. Ti zong a um huaha lo, Zarhkhat voihnih lawng takkholh a si. Ihnak zong um um,, Congrete ttuang ah pher pakhat le puan pante i vurh in ih cio a si. A mi thleidan nih a fak fawn. Kum 4,5 lawng a si rih mi ngakchia zong an tampi. Kan chuah hlan tiang ah thongchung ah ngakchia 2 an hrin hna. Cu hna pawl cu an harsa taktak. Lenglei thawngpang zei hmanh theih mi kan nei lo tiah RFA sin ah an chim.
Manipur ram a cozah nih cun Myanmar ralzaam hna ruangah kan ram buainak a zual chin tiah media sin ah an chim pah lengmang.
