CBN News, 01 Oct 2020 : Malaysia Covid-19 kaitharmi an karh than lengmang, tuchun 01 Oct 2020 Malaysia ramchung ah Covid-19 case thar hmuhchap mi 260 an um, Nizan ah khan case thar 89 hmuhchap an rak si, tuchun ah a let in a vun i chap than.
June 4 thawk in a tu tiangah tuchun ni hi ni nikhat covid-19 case thar hmuh tambik ni pahnihnak a si rih, atu ah case um mi cu 11,484 a si cang.
Health Director nih a chim ning ah hi zat case lak ah hin case khat lawng ramdang in Malaysia ah a vun lutmi a si, cucu ramdangmi UK in Malaysia ah a ra mi sin in a si tiah a chim.
“Case 259 hi local ai chonhbarhmi an si, hi lak ah 130 cu rammi an si i 129 cu ramdangmi an si”
“Case 259 chungin case 31 hi Sabah ah a rak tlawng mi an si, hi hna nih hin September 20 hnu ah Sabah in case 119 an vun karhter” tiah Health Ministry nih tuchun ah a chim.
Tuchun 01 Oct 2020 i case thar an hmuhnak hna cu Sabah (118), Kedah (98), Kuala Lumpur (13), Selangor (13), Johor (5), Terengganu (2), Perlis (2), Malacca (1), Pahang (1) le Penang (1) hna an si.
Malaysia Health Department nih thawng an thanh chap ningah Malaysia ramchung ah covid-19 karh lei a panh i case 31 khual tlawnnak Sabah cu Oct 3 thawk in ni 14 chung MCO lockdown le Stay at Home kalpi a silai.
Ramchung Covid-19 karhning kan zoh lai i mipi himnak ah hmun cheukhat ah MCO le Stay at Home (inchung i i erhkhanh) kalpi than a hau te lai tiah tuchun 01 oct 2020 ah an chim.
CBN News
