Shan ramkulh, Laukkai khuapi ah SAC ralkap 2,000 leng nih Kokang hriamtlai MNDAA sin ah hriam an chiah kong theih a si i cu kong he pehtlai in SAC lei ttanh telegram cheukhat bel nih co hlang duhlo in chikhat hnu tawl bia a si tiah an tarlangh ve.
Hriam a chia mi SAC ralkap hi an zapi ah 2,123 an si i, SAC kut tang ah zung rian a ttuan mi (Non-CDM) 1,601 zong nih MNDAA kut ah an i ap. MNDAA kut ah aa ap mi SAC ralkap, Pyitusit le Non-CDM an zapi ah 3,724 an si.
“Laukkaing khua SAC an sung cang timi hi a dik hrim hrim lo,ral kong herhbau nak ruang ah chikhat hnu an kir bia a si.a tu tiang Laukkai ah SAC IB le LIB cheukhat an um rih.a rauh hlan ah operation an thok than lai” tiah telegram channel hna hmang in an tarlangh ve.
MNDAA kut ah aa ap mi hna cu anmah duhnak hmun ah an kal khawh nakhnga an tawlrelpiak cuahmah hna lio a si.
Laukkai khuapi ah hin Kokang hmunram a kilvengtu SAC ralkap Regional Operations Command – ROC (Dah-Kah-Sah) timi Headquarters a um i, MNDAA nih cu Headquarters cu an lak cang caah Shan ramkulh chung i Kokang hmunram hi MNDAA kut chung ah a um cang.
Laukkai khua laknak ah hin MNDAA nih SAC ralkap meithal zun 2,000 leng le a dangdang ralhriam tampi an lak, tiah theih a si.
