Tuluk ram China’s National Space Administration nih nizaan December 4 ahkhan Thlapa cung ah an ram thantar an tarnak video an thlah. Hihi US hnu kum 50 ah thlapa cung thantar phunnak a si ve cang tinak a si.
Nizaan cacawnnili ni ahkhan Tuluk ram cozah vankawlawng fimthiam hna nih Chang’e-5 timi thlapa kainak rocket hmangin Thlapa cungah an ram thantar arfi panga cung puansen cu thlapa vawlei ah an tar khawh ve cang. Tuluk nih rocket (Probe) an thlah mi a min hi Chang’e-5 ti a si i, thlapa cung caan zeimaw a um hnu ah thlapa cung lung le vawlei he kan vawlei (earth) lei ah a rak i thawh than.
US cozah nih a luancia 1969 kum ahkhan Apollo 11 timi rocket cu thlapa an rak tlawng i US ram thantar cu an rak tar khawh pin ah thlapa cung ah a phan hmasabik ram ah an cang.
2012 kum ahkhan US nih thlapa voinga an tlawn chung ah an tar mi US thantar panga hna cu NASA nih an chek tthan tikah an dir peng ko ti a si. Asianin, nika ceu ruang ah an rong a tlau pah tiah an chim.
US nih thlapa cung ah phak hmasa ahhin a rak i tel mi Neil Amstrong le Buzz Aldrin hna pahnih ah Buzz Aldrin nih US thantar hi a rak bunh. Asinain, thlapa an tlawnnak rocket kam tuk ah a phun ruangah an i thawh tikah cun rocket thawri nih an thantar a rak choih ti a si.
Tutan ah Tuluk nih thlapa tlawng in thantar a va bunh mi hi minung i tel loin phun a si i, Tuluk nih a voithumnak thlapa vawlei ah an phak khawh nak a si.
Source: BBC
