SAC nih hramhram in uknak an laak in kum 3 a rauh hnu ah SAC kuttang ralkap le palik minung 40 tluk ah CDF-Hakha sin ah CDM an tuah kong CDF-Hakha in rianngeitu nih a chim.
“Uknak laak a si ka ah khan cun CDM a tuah tu an tampi,mah hnu ah pakhat tete,pahnih tete in CDM a tuah tu hi 40 tluk an si ve cang” tiah a chim.
2024 March 2 zong ah khan Hakha khuachung um palik pakhat cu CDF-Hakha sin ah hriamtling he CDM a tuah kong theih a si. Tutan CDM a rak tuahtu nih cun Meithal zun 1,kuan 300,kuan bawm 2,kut cheh bomb 2,kuan kham angki pakhat hna a rak i rat pi caah CDF-Hakha nih phaisa sing 50 laksawng an pek.
Kum 3 chung ah CDF-Hakha sin CDM a tuahtu hna hi ralkap nak in palik an tam deuh i hriam tling he CDM a tuahtu cu phaisa laksawng pek an si theo tiah theih a si.
“Kan sin a ral i dor mi chung ah hin hriamken lo in mah luat nak caah a rak lut mi an um ve, tam deuh cu hriam an rak i ken hna,hriam aa ken mi cu phaisa sing 50 laksawng kan pek hna hnu ah a himnak an phak tiang tuanvo kan laak hna” tiah CDF-Hakha riangnei tu nih Khonumthung Burmese ah a chim.
SAC kuttang rian a tuan cuahmah mi palik le ralkap hna cu a ran nak in CDM tuah ding in le CDM tuah duh mi paoh nih CDF-hakha sin ah pehtlaih khawh a si kong zong an thanh chih.
