Bago ramthen, Yedashe peng, mengtung 40 ah a um mi khuate pakhat ah kum 16 a si mi pa pakhat nih kum 7 te lawng a si rih mi ngakchia nute a tlaih hrem i a thah beh tiah theih a si.
ngakchia nute i a ttapa kum 5 ngakchia te zong thah a timh ve i a tuk a velh hnu ah a thi cang tiin a kal tak hna nain ngakchia pate cu thi lo in a rak nung.
October ni 15 ah zinglei sang ah khan lei thlam ah a um mi unau hna pahnih cu an in ah a lut chuak tawn mi kum 16 mino pa pakhat nih an khua he aa hlat nak ramtang ah a rak kal pi hna i a tu bantuk in a tuah hna hi a si.
“Khua le lei he aa hlat taktak nak hmun ah a rak kalpi hna i ngakchia nu te hi a tlaih hrem. A tlaihhrem tik ah ngakchia nu te nih duh lo in a cawl,aa thik len caah a hngawng in a dih i a lu cu vulei ah a suk chih caah ngakchia nute cu a thi. A ttapa te kum 5 ngakchia te zong cu namte in a tuk i a thi cang ruah tiin cu ti cun a kal tak hna.” Tiah khua mi pakhat nih a chim.
Ngakchia pa te a vun i thangh tik ah cun zaan a si cang i tiva ti zong a lianh caah a u ruak pawng ah cun kum 5 ngakchia te cu zaan khua dei a um i a thaizing October 16 ah khuami nih an kawl hna i ngakchia pate le cu an va hmuh tiah a chim chap.
“ kum 5 ngakchia te cu khoidah na u a um tiah kan hal tikah a u um nak cu a kan chimh i kan va kawl tikah a ruak in kan char.ngakchia pa te hi rak thi ve seh law a ho nih dah a tu bantuk in a tuah hna ti zong hi kan theih kho hnga lo.” tiah khuami pakhat nih cun a chim.
Tlaih hrem a tong mi ngakchia nute cu a hngawng a duk viar i a lu zong ah hliam hma a tuar leng ah a nu sinak zong ah hliam a tuar. A tta pa te zong cu a cal ah nam hma a tuar pin ah a hnawng zong ah hliam a tuar ve.
A tu bantuk in thah a tongmi ngakchia nu te cu nizan October 17 ah khan an khua ah a ruak an vui i mi tlaih hrem tu pa cu palik nih an tlaih tiah theih a si.
