Kachin ramkulh chung ah KIA le ttangti phu hna nih ni 5 chung an kalpi mi kahdohnak ah Chipwi khuapi,Hsawlaw khuapi hna telh in SAC sakhaan 13 an laak khawh i hriam thilri zong tam ngai ngai an laak khawh tiah theih a si.
Kahdohnak hi September 29 ah khan kalpi hram an rak thok i October 3 tiang ah khuapi pahnih le SAC sakhaan 13 an laak hi a si i hriam thilri tan taktak an laak pin ah SAC lei thi le hliam zong an tam ngai ngai. September 29 ah Chipwi khuapi cu laak a si i October 2 ah Hsawlaw khuapi zong an laak chih.
Nizan October 2 zinglei slm 7:20AM tluk ah khan Chipwi pengkomh,Hsawlaw khuapi telh in SAC sakhaan,Pyituhsit sakhaan hna cu an laak i SAC tlaih mi zong an tam ngai ngai tiah theih a si.
Cubantuk thiam thiam in September 29 zinglei slm 5 ah khan thok in Chipwi khua hram bunh mi SAC sakhaan,Pyituhsit sakhaan,Meng 4 gate sakhaan le Byuha sakhaan hna cu KIA,KPDF ttangti phu hna nih an laak i Chipwi khuapi zong an laak khawh hi a si.
September 30 zinglei slm 10:00 zong ah khan Waingmaw peng,Chipwi lei kalnak lampi cungah a um mi Shangaw khuate pawngkam ah a um mi SAC Pin sakhaan, le gate hngahnak sakhaan pawl cu KIA KPDF hna nih an laak khawh tiah theih a si.
