Sagaing ramthen,Kalaymyo chaklei Laimi tampi khuasaknak Pyin-Khone-Kyi khua cu SAC ralhraang nih mei an khangh caah Khrihfa biakinn 5 le zapi inn 400 leng a ciam tiah theih a si.
A luancia April 5 khan SAC ralhraang rual cu Kalay chaklei ah ralhmai an nor i Pyin-Khone-Kyi khua hi April 12 ah an khangh mi a si.
“SAC ralhraang rual hi Pyin-Khone-Kyi khua in Maw-si khua lei ah an kir caah nihin ah micheukhat khuachung ah an va lut i khuapi ti awk in a kaang dih inn 400 leng a si lai,khrifa biakinn 5 zong a kaang tiah” khuami pakhat nih Zalen ah a chim.
SAC nih an khangh mi Khrihfa Biakinn hna cu East Baptist Church,West Baptist Church, Wesleyan Church,Believer Church le Church On The Rock biakinn hna an si.
Khua chung ah a kaang kho lo mi inn le sianginn hna zong JCB hmangin an hrawng viar tiah theih a si i SAC ralhmai nor ruang ah Kalay chaklei khuate 9 hna cu ralzam dirhmun an phan tiah theih a si.
