Khin Oo,Wangyi khua in Shwetaw lei ah rian tuan ding in a kal mi mino 7 cu SAC ralkap nih an tlaih hna i an thah hna
Sagaing,Shwebo pengkomh,Khin Oo peng,Wangyi khua in mino 7 cu SAC ralkap nih an tlaih hna i an thah hna.An ruak pawl cu lam kam ah an hlawnh hna tiah mipi vengtu phu nih an chim.
SAC ralkap nih an tlaih hna i an thah mi Wangyi khuami mino 7 hna cu Kyaw Thu Hein(19),Ko Zaw Hein(15),Ko Min Ko(20),Ko Min Nyi (14),Ko Phyo Ngwe Soe(19),Ko Naing Naing(22), le Ko Thura Htun(21) hna hi an si tiah theih a si.
Cu mino 7 cu August 14 zinglei ah Wangyi khua i Shwebo mawtaw kuun ah an kal i Shwetaw khua ah rian tuan ding in an kal lio ah Shwebo-Kyauk Myaung lam no.2 sianginn hmai um SAC ralkap checknak gate ah an tlaih hna tiah theih a si.
Mah ka cun an tlaih hna i cu mino 7 cu SAC ralkap nih no.8 ralkap an cawnnak sianginn ah an kal pi hna.Cu ka ah cun an hrem hna i an thah hna.An ruak pawl cu Yatha khua ni tlaklei kap dinhnak hmun pawng ah an rak hlawnh hna i mipi vengtu phu nih an ruak pawl cu August 15 ni ah an hmuh hna tiah theih a si.
“Mino 7 cu an tlaih hna i SAC ralkap pawl nih no.8 ralkap cawnnak ah an kal pi hna hnu ah phung ning lo in an hrem hna i an thah hna.An thah hna hnu ah an ruak cu Shwebo ralkap cawnnak no.8 chaklei kap ah a um mi Khin Oo peng,Yatha khua ni tlaklei kap chuaknak dinhnak hmun pawng ah an hlawnh hna.Mipi vengtu phu pawl nih August 15 zinglei ah an hmuh hna.An khua ah an kal pi hna i an vui cang hna” tiah mipi vengtu phu pakhat nih a chim.(Crd.Khit Thit Media)
