Sagaing ramthen,Tamu pengkomh Khampat khua cu SAC nih laak than ding in rallam an sial tiah thawng kan theih caah kan mah lei zong timh cia tein kan um tiah CNO-Upper Chindwin Region in Brigade commander nih nihin December 5 ah a chim.
SAC Ralkap thazaang 200 tluk cu Khampat khua laak than ding in an rak kai i nizan December 4 ah Sawbua-ye-shin khua in nichuah lei Lat-Se-Yi-Kan an phanh caah kaphnih timh cia in kan um i zei tik caah poah ah kahdohnak a chuak kho tiah a chim.
“A tu an phak nak hi Khampat khua he cun aa hlat ngai rih nain khuami hna cu ramtang chuak tuk lo ding in ralrin kan pek cang hna.khuapi chung luh ding an i timh i khuapi an naih cun zei tin kan kham hna lai timi timh cia nak kan ngei ko.zei tik caan poah ah kahdohnak a chuak kho” tiah CNO-Upper Chindwin Region brigade commander nih Khonumthung Burmese sin ah a chim.
Khampat khua cu dothlennak ralkap ttangti phu hna nih November 7 ah tlamtling tein an rak laak khawh mi a si i India-Myanmar ramri chawleh nak lampi cung ah a um mi a si i a biapi ngai mi khuapi a si caah SAC nih laak than an timh a si lai tiah khua mi pakhat nih a chim ve.
“A tu bantuk thawngpang kan theih caah Khampat khuachung um cheukhat le Kalay-Tamu lampi cung um Nan Khauh khuate in mi cheu cu ral an hrial hna.Khampat khua chung No.1 sang um hna cu No.2 le 3 ah a zam mi zong an um pah hna” tiah Khampat khua mi pakhat nih a chim.
Khampat khuapi cu minung 5,000 tluk khuasak nak a si i Chin miphun a tam cem an um hna tiah theih a si.
