Burma ram cozah nih Kayah state tiah an rak thlen mi min cu hman ti lo ding in le Karenni state tiah hman cang ding in Karenni State Consultative Council (KSCC) Nih nizan November 23 ah a Thanh.
Britist cozah kuttang ah Burma ram a rak um lio te in Karenni ram cu mah ten khuakhan lairel in a zalen mi ram pakhat a rak si.
Kum 1948 January 4 ah Britist kuttang in Burma nih zalennak a hmuh hnu in a chuak mi cozah Phah-Sa-Pa-La (ဖဆပလ) nih tlangcung mi hna hmunram cu hriamnam thazaang hmang in Burma ram chung ah an rak khumh.1951 Burma Parliament nih Karenni state timi min cun thleng in Kayah state tiah an thlen.
Kum 1951 hlan chung vialte karenni miphun vialte le international zong ah karenni timi cu kau pi in rak hman cang mi a si.Karenni timi min cu karenni miphun hna cu a rak zalen mi miphun kan si nak a langhter tu min a rak si.
Cu caah hram hram in uknak a la tu hna dohnak i kan hman mi dothlennak min zong Karenni min bunh in kalpi a si.
Cu caah a tu lio thawng a tial cuahmah tu Media kip le journalist hna telh in a phu in rian a tuan mi kip nih kan konglam nan tial tik ah Kayah state tiah hmang lo in “Karenni State” tiah hman piak ding hi a biapi hringhran.
Karenni State Consultative Council (KSCC) Nih ralhraang nih kan min an thlen mi Kayah state timi cu kan cohlan khawh lo caah Karenni State ti in na kan hman piak cang nak lai kan in nawl hna tiah an chuah hi a si.
