CBN News, 22 Jan 2021 : Myanmar in Mizoram ah kunti (kunza) luhpi tawnmi ah agent pawl nih Mizoram border security, palik le Assam rifle pawl ziknawh phaisa an pek i Mizoram ah zalawng tein an luhpi tawnmi cu Mizoram sianghngakchia bu MZP nih Palik zung sang lei ah report an tuah i mawh phurtu minung pakhat an tlaih.
Myanmar in Mizoram ah Kunti an luhpi tawnmi cu Truck (kungka) pakhat phur ah India phaisa Rs 200,000 ziknawh phaisa an pek tawn i zalawng tein Mizoram ah Myanmar in kunti an luhpi tawn tiah report an an tuahnak Champhai palik bawizik SP Zarzoliana nih a chim.
Mizoram border security hna sin ah ziknawh phaisa a petu Agent hi Aizawl leimi, Lalzirlian a si tiah theih a si i Lalzirlian hi ramkhel lei ah aa hmangmi le cuhlan ah MZP hruaitu rak tuan balmi a si tiah theih a si.
Myanmar lei in Kunti Mizoram lei i luhpi tawntu chawlet pawl nih MZP hruaitu sin ah permit an hal i Mizoram ah luhpi tawn a si tiah bia chawkvak a um i Champhai MZP zung lei nih hi puhnak hi an theih lonak an chim i MZP aa telhmoih lo tiah Palik zungsang sin ah report an tuah hi a si.
CBN News
