SAC ralhraang hna nih a sining kong( Biography) lei hlathlai nak tete a um pah caah Kawlram cu hrialchung dingin Malaysia kal aa thawh mi Chin mino doctor pakhat cu nizan April 13,Karen ram hmun pakhat an phaak ah a baat a luan i a nunnak a liam tiah theih a si.
A nunnak a liam mi hi Dr.Khual Sian Tung a si.Tonzan peng Saipimual khuami Pu Pawng Khan Dal le Pi Dun Za Cin hna i an fa hniang a si i Specialist doctor (အထူးကုဆရာဝန်) a kum khat nak a kai cuahmah lio ah SAC nih 2021 i uknak a laak khan aa ngol i CDM a tuah tiah theih a si.
Covid-19 raipi a tlun lio zong ah khan zaanghlei cawi in mizaw pawl a tlopbul tu a si leng ah zapi nih hmaizah mi mino pakhat a si.
“Tang 7 tiang hi Tonzang ah a kai,cu hnu ah Kalaymyo Ciimnuai boarding school ah i Distinction 3 in tanghra a rak awng.cuhnu ah Magway sii lei sianginn ah a kumkhat nak siangin a kai i Rangoon ah aa thial i Rangoon in sianginn a dih” tiah Kalaymyo um a chungkhat pakhat nih a chim.
Doctor pa hi sianginn a dih in Mawlamyiane sii-zung ah rian a lut,cu hnu ah Rangoon Than-Lin sii-inn pi ah a lut than cu hnu ah specialist a peh i kum khat a dih,a kumhnih nak a kai ah ram buai he aa tong i a sianginn kai a ngol.
SAC kuttang ah riana tuan ti lo hnu ah Time Square Insurance ah kumthum tluk rian a tuan. A sining kong hlathlai nak hna a hun um caah Malaysia lei zaam dingin thil a hung si.tanglam in Malaysia an kalnak lampi Karen ram hmun pakhat an phaak ah a tu bantuk in a nunnak a liam hi a si.
Doctor Khan Sian Tung cu 1991 ah a chuak mi a si i a nunnak a liam ah hin kum 32 lawng a si rih.an chungkhar ninghin 2009 ah Tonzang in Rangoon khua ah aa thial mi an si hna tiah theih a si.
