February 1 in ai thawk mi ralkap nih mipi thim mi cozah kut in uknak an chuh hnu ah mipi nih duhlonak fak ngaingai in an langhter i, chawlehnak ca ah a um lo awk a tha lo mi Bank le cozah riantuannak tamtuk a dir cang ruang ah ramchung hman ding mi alh-hang kuatchanhnak a cat cang.
Kawl ramkomh phaisa a tla cuahmah cang i, thilman zong a kai cuahmah lio ah alh-hang kuatchanhnak a cat ve cang i a sau bik thla hnih chung hmang lawng a tang cang tiah theih a si. 2007 kum ah a rak cang mi Shwewayaung Tawhlanzi hnu ah a ngan bik mipi lamzawhnak a chuak i, Kawl ramkomh cu chawlehnak ca ah zuamcawhnak ngan ngaingai a tong cuahmah cang tiah ruah a si.
Kawl ramkomh chung ah Zinan chumhnak sehzung pawl hi an hme tuk i ramchung ah za lak in a pechan kho lo. Cu ca ah ramleng i bochan in cawk an si. Ramchung ah kan hman mi alh-hang paohpaoh i 98% hi ramdang ah cawk an si ti a si.
Reuters thawngzamh nih cun Kawl ramkomh chung ah chawlehnak pi a dir bak cang i, cozah vuanci zung dihlak dengmang in an rian a dir cang tiah a thanh cang. A ralai mi thlahnih chung ah alh-hang a dih lai tiah an ruahdamh i, hi kong he pehtlai in a tulio nawlngeihnak a tlaitu hna cu an hal hna nain lehnak an tuah lo.
A tulio ramchung ah CDM ti mi nawlngeihnak hramhram in a latu le cozah kan si ai titu hna nawlzulh loin rammi nih rian an tuan duh tilo tikah cozah rian, bank hna cu an rian a cat cuahmah cang. Hi pin ah cat chin lengmang ding zong mipi nih cozah riantuan pawl an nawl cuahmah lio hna a si.
Alh-hang kuatchanhnak rian a dirnak sullam cu ramchung in ramleng ah kawl ramkomh in kuat mi ngunkhuai le nawlpeknak a tuahtu Ngunkhuai zung le chawlehnak zung pawl nih CDM ah an i tel i an rian ai tuan tilo ruang ah a si ti a si.
Source: VOA
