Ni 40 hrawng lawng aa duh cangmi Myanmar ramkomh ram pumpi thimnak ah cun MP/MLA dihlak minung 7000 leng an i cuh lai i, NU hna nih hmun 1100 an i cuh lai. Hihi Myanmar ramkomh tuanbia ah Independence lak hnu thimnak tuanbia ah NU MP cuh tambik kum a hung si cang lai.
2020 Thimnak ah Nu ai cuh tambik dingmi ramkulh/ramthen hi Yangon ramthen ah a si lai. Yangon ramthen ah nu MP/MLA ai cuh dingmi dihlak 224 an si lai tiah theih a si.
Shan ramkulh hi a pahnihnak nu MP cuh tambiknak a si i, an dilah 205 an si lai.
2010 thimnak lio ahkhan Myanmar ramkomh chungah Nu MP ai cuh mi dihlak minung 127 an rak si. 2010 le 2020 zohkhek ah cun a let hra tluk in an tam deuh. Asinain, 2020 Myanmar ramkomh thimnak ah Nu hna an i telnak hi 16% lawng a si rih.
Minung 1100 nih thimnak ah an lut i, teinak an hmuh tikah minung zeizat dah Hluttaw chung ah Nu kan hmuh khawh hna lai timi cu lunglut ngai a si ti khawh asi. 2015 kum thimnak lio ahkhan nu 800 hrawng an rak i zuam i, palai 150 tluk cu teinak hmu in Hluttaw ah hmuh khawh an si. Ramchung ah Nu hna nih ramkhel ah i tel ve nak hi 2010, 2015 nak in tampi a thangcho tiah hmuh khawh a si.
Kawl rawn ram ah nu hna nih meefung pek khawhnak covo an rak ngeih hi 1935 kum khan arak si. Miniterial Burma cu mirang nih a rak uk lio ah thimnak a rak um lengmang. Frotier Burman a simi Chin, Kachin le Shan ram ah cun Independence lak hnu lawng ah thimnak a um. Kawl rawnram ah 1946 kum thimnak ah a hmasa bik nu MP zuamnak a rak um cang.
A tu Myanmar Ramkomh chungah cozah a ser lio mi NLD party cu 2020 thimnak Candidates 1143 lakah nu 213 an i tel. Cu ca ah NLD party nih 19% nu palai an i tel tiah chim khawh a si. USDP Party hi palai 1129 lakah nu 111 an i tel lai.
Tlangcung miphun party ah Nu hmunhma peknak a karh ngai mi hi SNLD party a hung si. Tukum thimnak ah thutdan 132 an ngei i, Nu hmunhma 37 a si. 29% hmunhma cu nu an pek hna tiah hmuh khawh a si. Rakhine Miphun Party hi thutdan 66 lakah Nu palai 6 an i tel. Chin ramkulh chungah miphun party nganbik a si mi CNLD party cu party policy ah nu i telnak 30% quota a pek nain, 2020 thimnak ah 10% lawng an i tel kho.
