Myanmar ramkomh nih minung nuai 15 (15 million) chunh khawh ding ca ah COVID khamsii cu India sin in kan cawk lai tiah Rampi Ruahnak Petu Aung San Suu Kyi nih nizaan, Christmas Ni ah khan a chim.
DASSK nih, “COVID khamsii cawk ding ah min kan thut cang. A tlamtlin cun a rauh hlan te ah COVID khamsii chunh khawh ding in timhtuahnak kan ngei. Rampi huap in kan zamh ko lai. A dotdot in papek mi pawl chunh an si lai. Papek bik mi ah ngandamnak riantuantu pawl mu. A herh ningin a rauh hlan ah COVID khamsii chunhnak kan zuam ko lai” tiah a chim.
Relchap: Vawleicung Ah COVID Khamsii A Chun Cuahmah Mi Ram Cheukhat
Kawl Ramkomh ngandamnak zung a si mi MoHS nih India ram siichuahtu Company a si mi Serum Institute hna cu theihthiamnak in COVID khamsii i zuarh ding ah Virtual in min kan thut khawh cang tiang India ram um Myanmar Embassy nih thawngthanhnak an tuah.
Kawl ramkomh aiawh in Ngandamnak Zung Research lei lutlai a si mi Dr. Zaw Than Htun le a zultu hna cu India ram ah an vakal i India ram nawlngeitu hna he biaruahnak an ngei.
Serum Institute hi Oxford University nih an tuah mi AstraZeneca COVID khamsii a chuah cuahmah mi an si.
Relchap: Zeitikah Dah Kawlram Komh Nih COVID Khamsii A Ngah Lai?
Source: Irrawady
