Nihin Myanmar ramkomh ah Tatmadaw nih cozah uknak cu a lak tthan taktak cang. Zing suimilam 8:30 Am ah rampi uknak cu General Min Aung Hlaing sin ah ap a si cang tiah ralkap TV a si mi Myawady TV nih a thanh cang.
2020 thimnak ah thimfung firnak le tlamtlin lonak a um ruang ah ramkhel daihnak a hawh ruang ah ramrian cu Tatmadaw nih kan lak tiah Tatmadaw lei nih an thanh cang. A tulio Myanmar ramkomh cozah hruaitu a si mi President U Win Myint le Daw Aung San Suu Kyi telh in, ramkulh ramthen Chief Minister hna zong tlaih an si cang.
Ralkap nih uknak an lak thawk Vice-President pakhat a si mi U Myint Swe cu caankarlak rampi president ah an thim chung. Ramchung ah kumkhat chung zualral thawng an thanh i, ralkap nih kumkhat chung uknak an i tlaih lai.
Tatmadaw nih an tlaih mi hna chung ah NLD party hruaitu upa hna leng ah ramkhel cawlcang tu zeimawzat an i tel. Sianghngakchia hruaitu hna zong an i tel tiah theih a si. Atu tiang ah NLD chimrelnak nawl ngeitu Monywa U Aung Shin, 88 Sianghngakchia hruaitu Ko Min Ko Naing, Ko Mya Aye, Ba-Ka-Tha hruaitu Min Thwe Thit hna zong an tlaih hna tiah theih a si.
Yangon khuapi chung ah Tatmadaw security pawl tampi an chiah cang hna i, zing suimilam 7:00 am hnu in security an rengh. Yangon International Airport zong luhchuah an phih cang. Ramchung ah internet line le phone line an thah ruang ah ATM in phaisa an chuah kho lo i, mitam pi thinphang le thlalau in an um tiah mithmutu hna nih social media ah an tar.
Source: BBC
