Yangon (CBN News) : CRPH nih Kawl ralkap dirh mi State Administrative Council (SAC) cu phungninglo in ram hruatu ah thimmi hna an tlaih ruang le ralkap doh-aunak tuahtu minung zeimaw zat an thah ruang ah SAC cu “Ralhrang bu” an si tiah thawng an thanh.
CRPH nih thawng an thanhchap ning ah United Nations nih record an tuahning ah zarhpini doh-aunak tuahnak ah ralkap le palik hna nih a tlawmbik lamzawh minung 18 an thah hna.
February 1 thawk in a tutiang ah ralkap le palik kut in minung 23 an thi cang, a thimi hna hi kum 17 in kum 59 karlak minung lawngte an si.
CRPH (Committee Representing the Pyidaungsu Hluttaw) nih an chimning ah ralkap cawlcangh ning cu a tu phunghram umcia mi ralchan cawlcanghnak a si tiah an chim.
“hi bantuk cawlcanghnak hi civil mi sualnak ngeilo mi hna lak ah raltuk doh ding thanh bantuk a si”
Atu kawlram buainak he pehtlai in Ralkap nih doh-aunak tuah in lam a zawhmi hna meithal in an kah hna, antlaih hna pin ah Journalist pawl warning an pek hna.
Ralkap bawizik hlun Nay Win nih a rak chimcang mi “Ralkap doh-aunak tuah in lam a zawhmi hna khamnak ah ralkap nih tinhmi ngeilo in vansang lei ah meithal an kap sawh ballo, minung khen timh in an kah” tiah a rak chim mi cu a tu tiang ralkap nih an thinh rih lo tiah The Irrawaddy News nih an langhter.
CBN News
