Kan Sin Ah PDF 38 Hriamnam He An Rak Kir Cang: Zaw Min Htun
SAC kut ah hriamnam he PDF 38 an lut cang, tiah SAC chimphuannak nawlngeitu Zaw Min Htun nih a chim.
Nizan June 16 ah Naypyitaw ah a voi 16nak thawngpang fianternak tuah lioah a chim hi a si.
SAC nih PDF telh in a dang phu zong upadi chung ah phung ning tein nan luh ahcun kan in cohlan hna lai, tiah June 12 ah cathanh an rak chuah.
Cathanh an chuah dih hnu June 15 tiang ah Magway ramṭhen Ngaphe peng in PDF 9, Sagaing ramṭhen Kalay peng in PDF 5, Ayeyawaddy ramṭhen Pathein le Kyonepyo(ကျုံပျော်) peng ah PDF 9 le Mandalay ramṭhen ah PDF 15, an dihlak 38 cu SAC sinah an lut, tiah Zaw Min Htun nih a chim.
Hriamnam he SAC sin a lutmi chung ah Magway ramṭhen, Ngaphe peng PDF 9 hna cu dohthlennak phu he pehtlaihnak a ngeimi an si lo, tiah People Revolution Alliance(PRA – Magway) ṭuanvo ngeitu nih a chim.
Ngaphe peng chung ah a cawlcang mi hriamtlai hi PRA-Magway ၊ 3T-Trangle le PDF phu 3 lawng kan um. SAC sinah a lutmi phu hi kanmah he aa pehtlai mi an si lo, tiah a chimchap.
SAC nih hriamnam chiah ding sawmnak cung ah, PDF hna nih kan cohlang lo i, a dongh tiang kan doh lai, tiah PRA-Magway ṭuanvo ngeitu nih a chim.
SAC nih PDF cu hriamnam chiah ding in a sawm len ko nain SAC ralkap le palik a zam i mizapi he aa fonhmi 10000 leng an phan cang, tiah theih a si.
