Naihrawng kan Chinram le Hakha Thantlang ah a hung linsa tukmi Malaysia tlung Mai Sui Hlei Tial ruak tlunh, kham, phum, thial kong ah Social Media cu fak ngaingai in a kan den. Hi thawng tilet nih fak piin Social media mithmai a thlen i, cu hlan ah party politic le thimnak kong cu chikkhat a hung daih kar ah kan rampi thimnak ni (28) lawng a hung i duh manh. Zeiti tha, tual ah a cang mi hi a tual minung ca ah Politic cu a si ko ca ah dih le dongh tiang caih a hau ko rua lai.
Mai Sui Hlei Tial ruak kong he pehtlai in October (3) thawk khan thawng a hung linsa pah cang. Thantlang No.3 Block hrawngin a hun i thawkmi le Laipawng lung hrawng in ruak kham, phum tiang ah thawng pipa ngai kan hun hngalh ahkhan cun Thantlang COVID-19 runvennak Komiti kha mawhchiat bik an hung si.
Thantlang penguk (GAO) siseh, Ngandamnak lei penguk (TMO) siseh, COVID-19 Runvennak Komiti siseh, media nih phone kan chawnh khawh ti hna lo tikah mipi nih thil fianghlang hnglahnak ding ca ah a har ngaingai. Tongte puh in puh top kha mipi lei dirhmun cu a si a hau cang. Thil sining tampi a hung i fianh i, nizaan ah Chin ramkulh cozah nih Media hmai ah thawngfianhnak le cathanh chuahnak an hun chuah in thil tampi a fiang.
The Hakha Times nih zahan zaan ah Biaknak lei, mino lei, ramdang lei le Thantlang No.3 khuabawi, Zantlang phu hna Social Media Tonpumhnak a hun tuah tikah thil a fiang chinchin i, Mai Sui Hlei Tial ruak kong ah chungkhar le Chin mipi lungput, nawlngeitu hna lungput cu fak piin aa tthen tiah hmuh khawh a si.
Cu lak ah aa tthen fak bik cu sangveng uknak Khuabawi, Sangbawi hna thinlung a si. Thantlang No.3 Khuabawi nih, “Kawl an si aipat tiah kan nehsawh piak hna hlah u, Thantlang hi humhim ko hna seh” tiah fiangpup in a hun chim tikah ruah awk tam ngaite khin mipi a arter hna timi cu Hakha Times Interview hnu suimilam tlawmpal ah Social Media cung cathlah tampi in hmuh khawh a si.
A hung fiang ngai mi cu Penguk le Khuabawi hna hi, khat le khat dirkamhnak le ruak kong linhsatnak ah biakhiaktu (Stakeholders) taktak ah ttangtti an si timi a kan hmuh ter khawh. Hibantuk thil linsa tiang a chuah lai dingmi ah Laito khuabawi nih a remremnak ser loin, ‘miphun kar huat khawhnak bia a thawktu hmasa tu Thantlang penguk le ngandamnak penguk hna bia’ a dirkamhnak zawn hi cu mi lu a kheuh ter ngaingai.
Penguk zung nih mipi cungah bia a khiah ding kong ah mipi ai-awh tu cu Khuabawi kha an hun si. Fiang ko in chim ahcun, COVID Komiti nih ngaihchia mi chungkhar cung ah bia an khiahmi cung ah ngaihchia mi chungkhar ai-awhtu cu Khuabawi a si awk a si. Tukar thilcang kong ah cun Thantlang No.3 khuabawi nih a mipi ai a awh maw awh lo dek.
Chin ramkulh cozah nih cathanh an hun chuah tikah, Media le mithmu tu hna nih an chim mi he fak piin aa khel tthan. Thawngfianhnak suimilam 1:30 chung an tuah ko nain, Pengkomh Uk (khayaing ohchohzi hmu) nih Thantlang penguk a dirkamhnak, Ramkulh Ngandamnak Uk (Pyine Cianmazi Hmu) nih Thantlang ngandamnak penguk a dirkamhnak nak le a Chin cozah nih daidam tein thil dih seh timi a langh tikah mipi lung a ar ngaingai timi hmuh khawh a si.
Hi buainak kong ahhin Thantlang peng mipi a ai-awh tu MP le MLA hna hmuh khawh an si lo mi nih khua a ruahter ngai fawn. An aw-an zong theih khawh a si rih lo. Hi zawn ahhin AI-AWH timi a hung langhnak a si ko rua. Nihin tilet hi tualchung ah cun Politic ah aa can sual ahcun Ai-awhtu hna kong ah thil aa su kho te kho zong a si. Hi tilet nih a ralaimi November (8) thimnak a suk lo hmanh ah a tlawm bik Khuabawi thimnak cu a suk teilai timi cu ruahdamh khawh a si.
Kan khuatlang nih mino, a dakral mi le chiat ni that ni ah mipi a ai-awh taktak tu mino Khuabawi a herh cang hna. Khuabawi sawhsawh siloin, Penguk le Pengkomh uk in Chief Minister tiang khi, mipi a ai-awhtu le mipi zawn a ruat taktak tu an chuah a herh tuk cang timi a hun kan cawnpiak ko rua.
Europe ram cheukhat ah cun mino nal deuh le vikvak an si lio ahhin penguk, district uk a ttuan mi an um lengmang. Cu mino nal Mayor (မြိူ့တော်ဝန်) pawl cu hmailei ahkhin President le Prime Minister hna an ttuan tawn. A silo ah NGO le Journalist rian ah caan saupi an ttuan hnu, sam rong a hun i thlen lai ahkhin MP an i cuh tawn. Kan nih ram ah cun ramkhel timi cu MP/MLA in kan thawkter colh ca ah a mi si nain MP/MLA cuh cu mithmuh kuttongh.
Kum 25 a tlingmi nih cun Khuabawi ttuan zong i timh ngam awk chan kan phan cang. Mipi ai-awhnak timi hi sangveng in kan thawk lo ahcun nihin MP/MLA tampi sining in cawnnak ttha ngai hmuh khawh a si. A um pah len rih te ko lai. Thantlang khuapi lawng siloin, Chin ram le kan rampi ah Kan Khuapi Hna Nih Mino Dakral Deuh Khuabawi A Herh Cang Hna.
Salai Tial Hram Ling (Yangon)
(Editorial hi catialtu dirhmun le hmuhning a si. CBN Dirhmun le pomning a silo_Editor).
