Sagaing ramthen, Chin mi tampi khuasak nak Kalaymyo ah SAC nih lamcung aa chok mi mino cheukhat an tlaih hna i ralkap tlak dingin an kalpi hna tiah tualchung mi nih an chim.
Nihin October 18 zanlei sang zong ah khan Cycle in aa chok mi mino 3 cu palik nih an tlaih hna i an kalpi hna.
“Cycle pakhat ah minung pahnih nak tam i cit ah cun tlaih a si. a hlan ah khan cun kum tling lo an si ah cun thutdir (ထိုင်ထ) an tuah ter hna i an thlah than hna.kum tling cang mi cu phaisa an rak liam ter hna. A tu ah cun kum tling lo an si cun phaisa in tlenh an hau. Kum tlin an si cun sakhaan lei ah an kalpi hna.tu zan lei zong ah khan Hnin That That Wai pawng hlei dongh nak ah khan mino pathum an tlaih hna i sakhaan lei ah an kalpi hna.” tiah Kalaymyo khuasa mi pakhat nih Zalen ah a chim.
Nizan October 17 zong ah khan Kalaymyo khuachung ah mino minung 6 tlaih an tong. Nizan cu Thadingyut zaan a si caah minung aa chawk mi an tam i SAC le Palik nih hin lam kiken ah mi an bawh i an tlaih hna.
September thladongh hrawng khan Kalaymyo le a pawngkam khua hna ah mino tlaih khih a tong mi an tam ngai i phaisa ting 20 in ting 40 karlak in an tlanh ter tawn hna i a luat than mi cheukhat zong an um nain minung tam deuh cu ralkap tlak dingin training anpek hna .
