Kalay peng Tahan-Latpanchaung lampi cung ah a um mi Tlangzawl (ညောင်းတော) khuami hna cu SAC nih pawta an suai hna (an thil an phorhter hna) i cu hna lak ah pakhat cu thilak an kah tiah theih a si.
Cu tin an meithal in an kah mi pa cu Pu Tluang Tin Zam,kum (44) a si i a ttaang ah meithal kuan 4 a lut tiah theih a si.
Thil sining cu, a luancia April 5 ah khan SAC ralhraang hna nih hin Vaphai khua i hmun a khuar mi PDF hna sakhaan cu kah ding ah rallam an rak sial i lampi an ton pah mi poah poah an tlaih hna hnu ah Tlangzawl khua i inn 2 chung ah an khumh hna.cuti an tlaih mi hna cu chun slm 2:00 tluk ah an thlah hna hna nain Tlangzawl khuami 5 cu an thil phur tu ding ah an kalpi hna.
Cu 5 lak ah cun lung zawtnak a ngei mi Pu Tluang Tim Zam zong aa tel ve i a ttih tuk hna caah a zaam.a tlik lio ah SAC ralhraang pakhat nih a hnu lei in a kah i a tlu,a tluk nak in a hun thawh zawn ah a dang SAC ralhraang 2 nih an kah than tiah theih a si.cu ni ah cun a tangmi minung 4 cu an tlah than hna tiah theih a si.
April 6 ah a ruak cu hmuh a si i,a ruak laak ah a kal mi hna cu SAC nih an kah hna caah an kir than i a zaanlei sang ah khuami hna nih muka in a ruak cu an zual i a rannak in an tlikpi tiah theih a si. Cu tin a ruak cu Du-Wai-Chaung thlan an an vui colh.
