Sagaing ramthen,Kalaymyo le Chin ramkulh hna ah electric mei a rat lo nak zarhhnih leng a si cang caah mizapi hna zung rian ah siseh,chungkhar rian ah siseh harnak an tong ngai ngai hna.
A luancia June thla dongh lei thok khan Kalaymyo le Chin ram kulh lei mei a pe tu Mahar electric line cu Ungtaw-Ngaung Pin Kyi karlak ah a rawh caah nihin tiang Kalay le Chin ramkulh ah electric a rawh nak hi a si.
“Mei a rat lo nak a sau tuk cang caah zung rian ah siseh inn i rawlchumh tikhin tiang a har sa ngai ngai.a tu lio cu datsi le diesel man zong a kai ngai ngai i generator on ding zong a fawi lo. Solar le battery hna i cawk ding tiah le a man a kai tuk fawn. A man a kai lawng si loin cawk awk thilri hrim hrim a har fawn.” tiah Kalay khuasa mi pakhat nih a chim.
July 14 ah khan Electric mei 230KV cu Chaungku zung tiang a phan cang nain cuka lila ah cun a rawh ve caah remh than a hau i cu remh nak ding ah a herh mi thilri hna a um lo caah hmundang ah an cah ve lio a si.cucaah Gangaw,Kalay,Kalaywa,Mawleik le Chin ramkulh hna ah electric mei a ngah rih lo nak hi a si.
A tu bantuk in mei a rat ti lo caah Hakha khualipi zong ah harnak an tong ngai ngai ve cang tiah theih a si.
“Mei a rat lo nak cu sau cang kaw a har ngai ngai.rawl chumh tikhin,Phone battery le a dang dang tiang a har ko.generator le battery nih le kan ngei ve tunglo le a fawi lo. Kan ram cu a hlan chan battery le Solar chan ah khan kir than dawh kan si. cu hmanh ah cun an man a fak tuk le zapi zaran caah cun a fawi lo.” tiah Hakha khuasa liomi pakhat nih CBN Daily News ah a chim ve.
Kalaymyo telhin Chin ramkulh hna ah mei a rawh nak a sau tuk cang caah mizapi nih chumhkhin nak ding ah mei holh,thing le gas deuh an hmang hna i meihol tun khat ah kyats 20,000,Diesel gallon khat ah 25,000 le Datsi gallon khat ah 40,000 kyats tiang an phan.
