Sagaing ramthen,Kalaymyo ah Baibal sianginn a kai lio mi Chin pa pakhat cu a luancia February 10 ah leng a chuah lio ah SAC nih an tlaih i an thah tiah a chungkhar hna sin in theih a si.
A nunnak a liam mi hi Salai Steven Cinglamkai kum 25 a si i February 12 tiangah a sianginn a phak than lo caah an kawl i Kalay Sii-inn pi ah a ruak cu an va hmuh.
“An Sianinn nih February 10 le 11 Out Pass an pek hna i leng ah a chuak,February 12 ah Inn a phak than lo caah a inn lei kan chawnh hna i a um lo an ti caah hmun kip ah kan kawl.khoika hmanh ah kan hmuh lo caah sii-inn pi ah kan va kawl.sii-inn pi ah ruak char mi pakhat a um an ti caah hmanthlak kan zoh tik ah a mah a rak si” tiah min langhter duh lo mi Baibal sianginn ca chimtu sayama pakhat nih Zalen ah a chim.
SAC kut in A nunnak liam mi ruak cu a chung le sin ah an pek duh lo leng ah mei in an khangh. A ruak hman thlak zong leng ah chuahter lo ding in SAC nih an tlerh khawnh hna.
“Zei tin dah thil sining a si kan ti tik hna ah cycle aa let i a thi mi si an kan ti, a ruak kan zoh tik ah a duk nak lawngte a si.Cycle accident ruangah put mi hma bantuk pakhat hmanh kan hmu lo,an mah nih an thah mi a si lo ah a ho nih dah an thah hnga,a ruak an khangh zong kan thei lo a vutcam tlawmpal lawng an kan pek” tiah chungkhar he aa nainiam mi pakhat nih a chim ve.
February 13 ah khan Salai Steven Cinglamkai ruak vutcam cu an phum i a ruak an vui.Kalay ah hin ni fatin ti awk in SAC nih chekhlainak fak piin an tuah i tlaih khih zong a tam ngai caah ralrin ngai a herh.
