Myanmar ramkomh thimnak kong he pehtlai in nawlngeitu UEC nih October 16 ah ramchung thimnak tuah khawh lonak ding hmun a thanh mi chung ah Kachin ramkulh ah a thanh mi ahcun ral ruangah chuahtak mi khua 80 hrawng aa tel tiah theih a si.
Kachin ramkulh ah thimnak tuah khawh lonak ding hmun tiah thanh mi khua 200 chung ahhin mipi nih chuahtak mi khua 80 le hriamtlai kuttang ah a ummi khua 100 leng aa tel tiah tiah a si. Cu ca ah thimnak a lut dingmi Candidates dihlak a hnursuar hna lo tiah theih a si.
Kachin ramkulh peng 11 chung ahhin thimnak tuah khawh lo dingmi khua 192 chung ah khua 89 hi khuarop ah an cang. Hriamtlai kuttang um khua 66 an um tiah UEC nih an chim.
Kachin ramkulh ahhin raltuknak a um ti lo nain Khua le khua ohsuh pawl, mipi nih chuahtak mi khua pawl, hriamtlai in uk mi khua pawl hi thimnak tuah ding ca ah rikhiah a um ca ah hitihin biakhiahnak tuah a si tiah kachin State UEC branch Secretary U Htun Aung Khaing nih a chim.
2018 hnu ah ralkah nak a um ti lo nain, Kachin ramkulh chungah thimnak tuah ding harnak a tam ruangah milu cazin hmanh lak khawh a si thai lo ti a si.
Asinain, KSSP nih cun a tubantuk in UEC nih an tuah tikah mipi an sung tiah an chim ve. Cu hlei ah kahdaihnak tuah lo zong in thimnak kong ah KIO le Cozah nih i zuam awk a si tiah an chim. Sumprabum peng ah thimnak tuah khawh lo ding Ohsuh 31 a um mi kong he pehtlai in SDPP Vice Chairman Kumrawng Aung Kham Nih cun, NLD nih tei a duh ca ah a si ko tiah a chim ve.
Source: Myanmar Now
