Hninsi party tiah theih a si mi UDP party an chairman U Kyaw Myint cu nihin October 23 ah biacaihnak ah an chuahpi nak ah “Ka sual lo” tiah a chim ve cang.
Nah-Wah-Tah cozah chan ah a silo ningin thong an ka thlak mi ka si ca ah sualnak ka ngei lo tiah UDP Chairman U Kyaw Myint nih a chim. A mah hi 1990 kum ahkhan thonginn leng siithlopnak caan an rak pek lio ah a rak zaam mi a si i, thongzaam sinak in September 27 ahkhan an rak tlaih tthan mi a si.
Mandalay khuapi Chan Aye Thar Zan peng biacaih zung ah nihin October 23 ah bia an caih hi a si. Nihin biacaih zung ah U Kyaw Myint cu PPE uniform aa hruk mi minung 6 nih an zulh i, palik tampi nih an zulh tiah theih a si.
U Kyaw Myint cu a tulio ahhin thongzaam sinak leng ah immigration phung a buar tiah a thapthap in taza an cuai i, a ngeihchiah cheukhat cu rampi thilri a si tiah chuh a si tiah nihin President zung chimrelnak ngeitu U Zaw Htay nih a chim.
