US ram ah cozah pakhat in cozah thar pakhat ah a hung i thlennak caan hmelchunh tiah an tuah tawn mi President thar chiatserh biakamnak ni cu zul duh lo in Joe Biden chiatser biakam ni ah Trump ka kai lailo tiah a chim.
Hi bia hi nizaan ninga ni ahkhan Twitter cung in a chim mi a si. Asinain, a tu ah cun President Trump cu Twitter Company nih Trump a twitter account an thah piak.
2020 US thimnak ah Joe Biden nih teinak a hmuh ko ti mi fehternak an tuahnak US Capitol Hill chung ah Trump a tanhtu tiah min a pu mi mibu nih an luhhnawh hna i, ralhrang bantuk buainak an ser hnu nihnih ah President Trump nih thawngthanhnak a tuah pah ah Chiatserh Biakamnak ka kai lai lo tiah a chim hi a si.
Asinain, a kai ding mi Joe Biden le acozah sin ah cozah uknak pek than ding cu tluang tein kan tuah ko lai tiah a chim.
US President sinak in president thar pakhat chiatserh biakamnak ah kai lo hi US tuanbia ah kum 152 hnu ah a can hi a si. A luancia kum 1869 ahkhan President Andrew Johnson cu President thar Ulysses S. Grant inauguration day ah a rak kai duh lo. President Andrew Johnson hi term khat lawng a rak tuan i, impeachment an rak tuah mi US President pathum lakah pakhat a si.
President Donald Trump a hnu lei in a dirkam peng tu Vice President Mike Pence zong hi naihrawng President Trump he lunghmuh lonak fak ngai an ngei ti a si. Vice President Mike Pence tu cu President thar Joe Biden biakam ni ah kai dawh a si ko ti a si.
A luancia ni thum ni ah a cang mi US Capitol Hill buainak ruang ah January 20 ah tuah ding mi Inauguration Day cu Security chah ngai in tuah an timh tiah theih a si.
Source: Washinton Post
