CBN Sport News, 19 Oct 2020: Milan nih Zlatan Ibrahimovic goal 2 hmangin Inter Milan 2-1 in an tei, a tu Season Serie A chuihnak ah mipi nih an ngaihven bikmi tiah ruahmi ah Point 3 sunglawi ngaiin an hmuh.
Zarhteni zan San Siro chuihnak ah a hmun i zohtu minung 1,000 hrawng lawng an um kho, Stadium a lawng ngai nain a hmun zohtu umlo nak cha cun a sunglawi țhiamțhiam.
First half hlan ah goal 3 a lut kim, Ibra nih goal 2 a thun pin ah Inter striker Romelu Lukaku nih goal 1 Milan lei ah a thun ve.
Stefano Pioli naule hna nih hin Match 4 an chuihnak ah Point 12 hmu in hmai hruaitu an si, Serie A club vialte lak ah Season a tu kal liomi ah voikhat hmanh a sung rih lomi um chun an si. A pahnihnak Atalanta nakin Point 3 in an sang deuh rih.
Zlatan Ibrahimovic a dam cang
Covid-19 ruangah caan zeimawti chung quarantine in erh a si, a sinain Milan Derby khel dingin Ibrahimovic a rak kir cang. Swede Striker Vompi nih hin minute 13 nak ah țihnung ngai in goal kûnchung ah ball a luhpi i Penalty a co.
Ibrahimovic penalty chuihmi cu keeper Samir Handanovic nih a rak dan khawh nain ball vun kirțhanmi cu amah Ibrahimovic țhiamțhiam nih kuanpi in a nolh țhan i Keeper Samir Handanovic caah tlaih khawh a si tilo, fawizang tein goal ah a lut.
Ibrahim nih goal a thun tlawmpal minute 3 ah goal 2 nak ding Rafael Leao nih ball a tuahpiakmi cu Vom Ibrahim nih goal chung ah dawh taktak in a thun chap than.
Inter an lung a dong hlei loh, minute 29 nak ah Striker Lukaku nih naihte in Milan goal ah a thun ve i goal khat an cham. Goal 2 chamnak ding winger Ivan Perisic nih ball dawh taktak in a vun chanh țhan i Belgium international nih hin goal chung ah a lu in a tauhluh khawh nain goal tung tlangpi cung ah țhimfang ngaw bak in a nganh sual.
Kham khawh silo Vompi!
Nai hrawng ah Milan nakin Inter an sang deuh, atu ah cun thil sining a vun i thleng. Ibrahimovic nih “Milan nih hin kum 4 chung Milan Derby ah cak ni an ngei loh ti ka theih, zarh 2 chung quatantine in erhmi sihmanh ninglaw Milan champion pi duh ah tihal in ka hal”
“Covid-19 hrik ka rak kai ruang ah khan tlawmpal tein thawnam ka theihnak a tlau, asinain ni 3 lakthlak in ka ngandamnak zohthan peng a si, a tu bantuk Match a biapi tukmi ka chuih khawhnak ding ah zei thil hmanh nih a ka kham kho lailo” tiah a chim.
Ibra hi kum 39 mi a si i season hmaisa chunhnu lei ah khan Milan ah a lut. A contract hi season khat caah sauh țhan a si i season kal lio mi ah Derie A match 2 a chuih nak ah goal 4 a thun manh cang. Europ league qualifier lei zong ah goal 1 a thun manh ve cang.
CBN Sport News
