Kalay peng Chin mi khusak nak Pyidawthar khua cu inn 1,000 tluk a um i a luancia May 3 thok khan Kalay khuachung ummi ralhraang hna nih Kalay peng khuate hna ah an luh caah tualchung hriamtlai phu le SAC kar ah kahdohnak pehtlai in a chuak i inn 1,000 tluk chung ah inn 900 leng cu a kaang i a ciam dih tiah theih a si.
A taang mi inn 50 tluk zong cu bomb ci nih a peh mi le kuan nih a khen mi he tiin an rawk viar i Pyidawthar khua chung inn pakhat hmanh a him ti lo tiah theih a si.\
Kalaymyo in nitlak chaklei ah a um mi Pyidawthar khuachung ah SAC ralhraang hna lut in mei an khangh caah Baptish biakinn dah tilo khrihfa biakinn dang vialte mei nih a kangh viar tiah June 7 i khua chung a va lut mi hna chimnak in theih a si.
Pyidawthar khua ah hin Khrihfabu 12 an um i biakinn 17 a um.cu chung ah 16 cu an kaang i an rawk viar tiah theih a si.
“A tu ah cun SAC ralhraang nih Pyidawthar khua an chuah taak cang.khuami cheukhat khuachung ah an va lut i an inn le lo an va zoh cio.khuachung ah bomb a tamtuk caah an i ralring ngai.June 7 ah khua chung inn a va zoh ve mi Pu Kam Van Mung cu a kir lei ah bomb aa lamh sual caah a kehlei ke aa cik i khat lei zong aa hliam chih” tiah Pyidawthar khuami pakhat nih Chin World ah a chim.
