Nizaan zarhte ni ah Jakarta khualipi in Pontianak khua lei ah ai thawh mi vanlawng cu ai thawh hnu caan tlawmpal ah a pehtlaih khawh lo in a um i rili ah a tla tiah theih a si.
Hi vanlawng a rawkral pelpawl hna cu Jakarta khualipi he ai naihnak rili cung ah nihin zarhpi ni ah an hmuh hna tiah Jakarta Post nih a tial.
Vawleicung Vanlawng pawl zuan ning chekhlatnak website pawl nih cun Indonesia vanlawng hi Radar pehtlaihnak in a tlau hlan te ahhin vancung pe thonghra tiang hi a ttum ti a si. Hi vanlawng hi Sriwijaya Air flight 182 — Boeing 737-500 a si i, minung 62 a phur hna tiah theih a si.
Micheu mit hmutu an um i, puahkeh thawng zong kan theih ko tiah an chim ti a si. “vanlawng ningpi in mei alh pi he rili ah a tlak ka hmuh ee” tiah ngatlai pakhat nih BBC Indonesia ah a chim.
Hi vanlawng a tla mi hi kum 27 hrawng a upa ve cang ti a si. Jakarta Post nih a langhter ning ah cun Jakarta khualipi in a va hlat tuk lonak rili ah vanlawng rawk pelpawi kan hmuh khawh cang tiah an tial.
Source: BBC
