Kan hnuzarh zarhte Ni ah Indonesia khualipi Jakarta in ai thawh hnu caan tlawmpal ah rili ah a tla mi Boeing 737 vanlawng black box cu kan hmuh khawh cang tiah nawlngeitu hna nih thawng an thanh.
Thawngpang hram: Indonesia Vanlawng Tlau A Rawk Pelpawi An Hmuh Cang
Vanlawng a tlaknak hmunhma velchum ah tipilh thiam hna nih an kawl hnu ah black box hi an hmuh khawh a si tiah an chim. Black Box ti mi cu vanlawng pakhat chung ah zeidah a cang ti mi record a tuahtu kuang a si.
Minung 62 a phurtu vanlawng Sriwijaya Air vanlanwg hi Pontianak khuapi lei ah ai thawh hnu minute 4 chung ah radar in a tlau ti a si. Caan tlawmpal ah rili ah a tlak lio cu ngatlai hna nih a lang in an hmuh ti a si.
Hi vanlawng kawlnak ca ah tilawng pahra hrawng cu vanlawng tlak nak tiah ruah mi velchum ah vanlawng tla an kawl hawl cuahmah ko rih ti a si.
Jakarta khuapi in Pontianak khua hi minutes 90 hrawng zuang a si. Vanlawng hi a tlak lai ah harnak kan tong ti mi signal zong a lang lo ti a si. Vanlawng atlak pah ahhin puahkehnak ngan ngai a cang tiah theih a si fawn.
Vanlawng chung ah ahodah ai tel?
Hi vanlawng Boeing 737 hi minung 130 hrawng a tlum mi a si i, khualtlawng minung 50 lawng an i cit. Vanlawng riantuan minung 12 an i tel. Vanalwng chung ah hngakchia 7 le nausem pathum zong an i tel ti a si.
Pontianak khua vanlawng tual ah an chungkhar cio dongtu hna cu vanlawng thawng theih in thlalau taktak in an hngak hna. “kei ka chungkhar minung 4 an i tel. Ka nup le ka fale 3 an si” tiah vanlawng a hngaktu minung pakhat nih cun ngaihchia ngai in BBC News ah a chim.
Vanlawng kong he zeidah kan theih chap?
A tu a tla mi vanlawng hi kum 26 hrawng a upa cang mi a si. Jakarta khualipi in meng 12 hrawng ah a tlaknak hi a si i, hika hmun hi 2018 kum October thla ah minung 189 a rak phurtu vanlawng a rak tlaknak he ai hlat tuk lo ti a si.
Hi lio ah Lion Air flight cu Jakarta in ai thawh minutes 12 ah a rak tla ve. Vanlawng ai cit mi dihlak in an nunnak a rak liam. Khuacaan that lo ruang ah a tla tiah chim a si nain, vanlawng khaltu hna daithlan ruang ah a si tiah an rak chim len.
A tu vanlawng a tla mi hi Black box an hmuh cang i, an chekhlat hnu ah zeiruang ah dah a tlak ti mi thawng theih khawh a si telai. A tutiang ah cun ai cit mi dihlak thih dawh nih a naih bik a si.
Source: BBC
