Indonesia ram ah a luancia ninga ni ahkhan 6.1 Magnitude thazaang angei mi li ai hninh ruang ah mithi 78 an phan cang tiah VOA nih a tial.
Indonesia ram Sulawesi ramkulh Mamuju district chung ah ninga ni ahkhan li aa hnin i, a tu tiang hi mithi an kawl cuahmah hna lio a si. Minung 800 reng lo hliamhman an tuar i, minung thong reng lo innlo ngei lo in an um tiah theih a si.
Indonesia Vanlawng Tlau A Rawk Pelpawi An Hmuh Cang
Hi lihnin a dih in zarhpi ni ahkhan fak taktak in ruah a sur i, innlo cim mi nih minung a nenhkhumh mi chanhchuahnak zong a hnahnawh ngai hna tiah theih a si. Hi lihnin ruang ah thih a tong bik hi Mamuju khuapi ah an si tiah theih a si.
Lihnin a can hnu suimilam 24 chung tiang chanhchuah khawh lo mi paoh cu an nunnak ca ah ruahchannak a tlawm ngai cang tiah thiamsang hna nih an chim. A tutiang zong an kawlhawl cuahmah hna lio a si.
Innlo cim mi nih a nenh khumh mi chung in minung 18 cu an chanhchuah khawh cang hna. Hi mi hna chanhchuah khawhnak ca ah uico rim hnimh thiam pawl an hman hna i, nihin tiang an kawl cuahmah lio hna a si.
Hi Lihnin ruang ah minung 19,000 cu innlo ngei loin caankarlak dornak ah khua an sak lio a si tiah VOA nih thawng a thanh.
Source: VOA
