Ram milu 1.3 billion tluk a si mi India ram cu Asia ram ca ah COVID-19 khamsii man deng tein zuar khawh ding ah ai zuam cuahmah lio a si tiah theih a si.
A tulio ah India ram he COVID-19 chuahnak ding ca ah a lung a tho ngai mi ram hna hi Bangladesh, Myanmar, Qatar, Bhutan, Switzerland, Austria le South Korea hna hi an si tiah theih a si. India ram hi nitlak ram pawl nakin COVID khamsii mandeng deuh in a chuahter khotu ram an si.
Kan hnuzarh zong ahkhan India Prime Minister Neranda Moodi le Bangladesh ram PM hna cu Online in biaruahnak an ngei i, India nih Bangladesh ram he i bawm in India ram ah COVID-19 khamsii chuah ding ah an lung a tling ti a si.
India ram ahhin a tulio ah anmah ram nih an chuah ve mi COVID khamsii Covaxin le Covishield timi sii pin ah vawleicung COVID khamsii minthang phun 6 hna cu ramchung ah hneksanak an tuah cuahmah lio a si.
India ram hi vawleicung COVID khamsii chuahnak ah zatuak 60% an si tiah theih a si. Cu ruang ah COVID khamsii an hmuh hlan te khan COVID khamsii a chuahnak ahhin India hi a biapi bik ram a si telai tiah an rak zumh mi a si.
Asinain caankarlak ah India ram cu COVID nih fak ngaingai in a hun tlak ve tikah ram mi nuai 10 leng in zawtnak an i chawnh i minung 146,000 leng an nunnak a liam. Cu ruang ah ram innpa pawl ca ah COVID khamsii kong zawnruahnak a ngei kho lo ti a si. August thla ahkhan India nih a ramchung ah COVID khamsii nuai 300 chunh ding ah timhlamhnak a rak ngei.
A ralaimi COVID khamsii chuahnak kong ahhin vawleicung ah tambik a chuah khotu hi vawleicung ah India ram hi bochan bik a si telai tiah zumh a si.
Relchap: Kawl Ramkomh Nih India Sin In COVID Khamsii Nuai 15 A Cawk Lai
Source: Nikkei Asia
