India ram nih Innpa papek (Neighbourhood First) tiah Myanmar ram telh in a innpa ram pawl hna cu COVID-19 khamsii a phawt cuahmah cang hna. Hi khamsii kong he kan theih khawh tawk cu a tanglei bang in an si.
Tutan India nih a ram innpa pawl COVID khamsii a hun phawt mi hna hi Vaccine Diplomacy tiah mi tam deuh nih cun an auh. COVID khamsii in hawikomhnak kan ti lai cu.
India nih a chuah mi Covidshield ti mi hi UK ram Oxford University le AstraZeneca hna i bawm in an chuah mi he ai khat mi a si. A chuahtu ram India a si ruang ah a min cu a dang in an thlennak a si.
A dang pakhat an chuah mi hi Covaxin ti a si i, India ram Bharat Biotech nih an chuah. India ram hi COVID-19 khamsii chuahnak hmunruk hrawng an ngei. Cu ca ah vawleicung ah khamsii 60% tluk a kan chuah piak.
Covaxin Cu Zei Set dah Asi?
Covaxin hi India cozah nih phaisa hram chuah pi in Bahrat Biotech nih an chuah mi a si. Hi company hi khamsii chuahnak ah kum 24 hrawng hmuhton a ngei cang mi an si. A hlan ah vawleicung khamsii phun 16 an chuah cang i, vawleicung ram 123 ah an rak kuat khawh cang.
Tutan COVID-19 khamsii an chuah mi hi Coronavirus hrik a thi cia mi in an ser mi a si. Cu ca ah minung pumchung chunh a si tikah tih a nung lo deuh cem ah a cang. Coronavirus a thi cia mi pumchung ah chunh a si tikah minung kan pum nih hin Coronavirus a si kha a theih ko ti a si.
Cu ca ah kan pum nih antibody timi ralvennak kha a chuah (Coronavirus a thi cia dohnak ca ah thazaang a chuah). Cu tikah COVID-19 hrik taktak a luh tikah kan pum nih a doh khawh tiah sii lei thiamnak cun a fawinak bik in chim khawh a si.
Hi sii hi minung pakhat ah durhnih chunh a si. Zarhli chung ah chunh a si. Sii hi -2 in -8 degree centigrade tang chiah ah a him lai ti a si. Covaxin hi India ram ah nuai 20 hrawng an chuah cang. India ram ah sehzung pahnih an ngei i, hi sehzung pahnih hin 2021 chung ah nuai 700 kan chuah khawh lai tiah an chim.
Covaxin Kong Ah Bia-alnak Cheukhat
India nih an chuah mi Covaxin hi India sii-ai lei nawlngeitu zung nih, “A hlankan in i ralrin awk a tam ca ah mipi sinah siseh, zualral ca ah siseh, khamsii hneksaknak ca lawng ah hman chung ding a si lai tiah an thanh. Cu hnu cun bia-alnak a hung chuak ti a si. A bik in Virus thar a chuak mi pawl khamnak ding ca ah i ralrin ngai awk a si lai tiah an hun thanh hnu in bia-alnak a hung chuak deuh.
Minung sin ah hneksaknak dot lawng a phan rih mi sii cu zeitinah mi tampi sin chunh ding ah cozah nih nawl a pek tiah sii lei thiamsang hna nih biatak ngai in an dohdalh. Asinain, a chuahtu Company nih cun hi sii hi a him ko lai tiah an chim ve.
Covidshield Cu Teh Zei Set Dah A Si?
Vawleicung khamsii chuahnak ah a nganbik a si mi Serum Institute nih an chuah mi Covidshield hi Oxford University le AstraZeneca hna i bawm in an chuah mi khamsii a si i, Serum Institute nih a chuah ca ah a min an thlen mi a si. Thlakhat chung ah nuai 50 kan chuah khawh lai tiah an chim.
Hi sii hi Chimphanzee zawng pawl chung ah a um mi tlangrai zawtnak virus (adenovirus) kha an lak i, cu hnu ah COVID-19 khamsii an ser mi a si. Hi sii hi COVID-19 virus he i lo in an ser mi a si. Virus a si ko nain minung ca ah harnak an pe lemlo.
Hi sii hi minung taksa ah an chunh tikah minung taksa nih zawtnak doh khawh thawnnak in thilnung an hung chuak i, Coronavirus kha a doh khawh ti a si. Hi sii hi voihnih chunh a si ve. Zarh li in zarh riat chung ah chunh an si. Covaxin bantukin innchung tikhal kuang sawhsawh ah chiah khawh a si ca ah kuatchanhnak ca ah a fawi ngai ti a si.
Covidshield Cu A Tha Taktak Maw?
Oxford le AstraZeneca hna nih an chuah mi sii hi avoikhatnak ah zatceo, avoihnihnak ah azapi in chunh asi ahcun zawtnak 90% a kham khawh tiah vawleicung ramkip an hneksaknak phichuak hna in hmuh khawh a si.
Source: BBC
