Falam hrambunh CNDF nih CNDF telhin Chin brotherhood le CNA karlak ah zei bantuk ton biaruahnak hmanh um loin CNA nih Falam khua chung ah operation nan kal pi kho lo tiah April 24 ah khan caa an kuat hna.
Hi kong he pehtlai in CNO GS Salai Willian Chin nih “kan ram le kan hmunhma cio ah ral lei siseh ramkhel lei siseh timhlamh cia mi kan ngeih lio ah phu khat le phu khat kar ah theihter nak zeihmanh um lo in cawlcang cu a tha lo.phu khat le phu khat kar ah upat nak i pek a hau.CNA nih cun Hakha le Thangtlang laak ding an ngeih ko.cu ti kan ti mi an duh lo ahcun kan mah lei in kan i timh cia mi a um ko. Cu bantuk thil cu chuak hram hlah seh” tiin Khonumthung ah a chim.
Falam khuapi laak nak ding ah hin kum cheu tluk timhlamh nak kan ngei cang i hi caan ah CNA nih mah nawl in rak cawlcangh lo awk ah caan an pek hna hi a si.
CNA le CNDF ralbawi zik hna pahnih zong a rauh hlan ah tonnak an ngei lai tiah theih a si i a nithla zong khiah a si cang.
Cu pawl kong he pehtlai in CNA chimphuannak nawl ngeitu Salai Htet Ni nih cun “khuapi laak kahdohnak kan kal pi lai kan ti caan ah ngaichiat awk ngai thil cu local defense Force pawl nih an kan sianh tawn lo.a si nain kal pi ding kan ngeih mi rian cu kan kal pi thiam thiam ko lai.zei ruang ah ti ah cun ral timi cu hngah awk a tha lo i an mah kha caan tampi pek awk an tha lo. Tuah awk kan ngei mi cu pehtlai in kan tuah ko lai” tiah CIC he biaruahnak an ngeih nak ah a chim.
Chinland Council nih hin Chin brotherhood aa ti mi hna sin ah ton biaruahnak ngei dingin an sawm hna nain Falam hmunram ah hmunhma nan laak mi le taxs nan laak mi pawl nan ngol lawng ah kan in ton hna lai tiah CNO/CNDF lei nih cun an rak leh ve hna tiah kan theih.
