US ram ah Cozah a dotu hriamtlai pawl a si mi boogalo Boys timi mibu le President Donald Trump thapetu mibu pawl cu US ram ramkulh cheukhat Capitol hmai ah an chuak i an i pum cang tiah theih a si.
US ram ah President thar Biden biakamnak tuah lai a naih cuahmah cang. US ramchung ramkulh kip ah hriamtlai phu pawl meithal he buainak an chuahpi khawh timi thawng zong a rak chuak. A tu zong US ram Lansing khua Michigan capitol hmai ah siseh, Columbus khua Ohio ramkulh Capitol hmai ah an i pum cang tiah theih a si.
January 20 ah tuah ding mi President thar Joe Biden Biakamnak a tuah hlan ah Washington DC Capitol Hill cu US National Guard pawl nih an ven cang i, lam zong an kham cuahmah cang tiah theih a si.
A tulio cu Ohio, Texas, Oregon le Michigan ramkulh Capitol zungpi hmai ah Trump tanhtu mipi le hriamtlai cheukhat pumh an i tim cuahmah cang tiah theih a si.
President thar ding Joe Biden cu US ram chawlehnak ai tunmer khawhnak ding ca ah tiah US dollar 1.9 trillion bawmhnak kan thawk lai tiah a chim. Cu leng ah cozah a tlaih hnu ni 100 ah US ram ah COVID-19 khamsii nuai 100 kan chunh khawh lai tiah a chim cang.
A tulio US ram Washington khualipi ahcun President thar Biden Biakamnak a tuah ding a si lai ca ah National Guard nih biatak tein runvennak an tuah i, mibu ser zong an khap, lam cheukhat zong an kham cang tiah theih a si.
Zarhpi Ni zong ahkhan Capitol Hill hmai ah Pistol pakhat, zenthong bawm thum le phunglut lo hriamnam cu kum 22 a si mi Virginia ramkulh tlangval pakhat sin in an tlaih tiah theih a si.
COVID-19 ruang ah Nithum Ni ah tuah ding mi President thar Biden biakamnak tuah ding mi cu kum dang bantukin tuah khawh a si lai lo i, tuanvo kan ngeih ning bantukin kan tuah lai tiah Vice-president thar ding Kalama Harris nih a chim.
Source: Mizzima
