Kawlram ah nifatin in mizapi umnak le dothlennak ralkap cungah bomb a thla i a that cuahmah tu SAC ralhraang nih tlangcung hriamtlai hna le PDF hna,dothlennak a tuah mi hna nih hriam chiah dingin le a tu lio buai nak cu ramkhel kalphung in daih ter dingah nizan ah khan sawm nak a tuah.
2020 thimnak lio ah NLD cozah nih phungning loin vote an fir caah a chuak mi ramkhel buaibai nak cu ruah piak than dingin le remh than dingin tiah kan nawl lengmang hna nain zei ah rel loin ram pi uknak cu duh poh in tlaih an timh caah Myanmar ralkap nih 2008 phung he aa tlak ningin uknak kan rak tlaih hi a si tiah an langhter.
2008 phung ningin party tling democracy tuah dingin timhlamh nak kan ngei peng nain Myanmar ramchung hmun kip ah ramkhel buaibai nak cu hriam hmangin an kan leh rul caah Myanmar rampi thanchonak le himnak lei ah kan thlacham ngai ngai tiah an langhter chih.
A ra lai mi October 1 thok in thimnak tuah nak dingah a biapi bik mi milu rel nak cu kan thok cang lai caah hriam a tlai mi a ho nan si poah ah nan hriam cu chia ulaw ramkhel lam in maw, thim nak chung ah lut ve in maw ramkhel kalphung in kan ram buainak hi kan daih ter hna lai tiah SAC nih sawmnak a tuah hi a si.
Hi kong he pehtlai in Myanmar ram chung i tlangcung hriamtlai le PDF hruaitu hna nih cun a tu bantuk SAC nih sawmnak a tuah mi cungah an lung a tlin lo kong le SAC nih ramkhel lei in chuah nak a ngeih ti lo caah a tu bantuk in a tuah mi a si kong an langhter cio.
CDF-Hakha nih cun October 1 tik i SAC milurel nak ah aa tel mi poah cu Non-CDM nan si zong ah kan in hmuhnak poah ah kan in kah hna lai tiah kan hnu te ah khan ralrin nak a sang bik an pek hna.
