“Sa thahnak” ah rian a tuanmi ngaknu cu zapi lawi hnuah khin sa thahnak i, a kihnak bikah sa a thahmi chek dingah a va kal. Ruah lo pi in innka lock a tla i, innka cu a awng kho ti lo. A aulen zongah a kihtuknak (aircon) khan cu a pit tuk caah lenglei in aw pakhat hmanh aa thei lo. a phone le leng lei a cabuai ah a chiah ta fawn. A dongnak ah a lungdong ngai i, hi tin maw ka thi ko ne lai tiah a ruah i, kik nih a hlawm lio ah khin, Innka cawngtu pa (Security) pakhat nih ruahlo piin innka a van awn i, ngaknu cu a van chanh khawh.
Ngaknu nih cun, “Ka lawm tuk ti hmanh a chim hlanh ah, zeitindah hi ka ka um hi na thieh tiah van hal?” Security pa nih a lehmi cu, “keimah cu hi ka ah security ka tuannak hi kum 20 a si cang. Riantuanmi tampi a lut chuakmi hi chawh le biak a hmangmi an tlawm te. Cu chungah nangmah hi bia nemte le hmaipanh tein “Good Morning” a ka titu le na lawi lai ah “Good Bye” a ka titu na si peng. Tuchun zong ah na luh pah ah, “Good Morning” na ka ti. Asinain “Good Bye” tiah na ka ti ti lo caah, hi chungah hin harnak pakhatkhat a tong kho ti kan ruah caah kan kawl lengmang i kan hmuhmi na si ee” tiah a van leh.
Hi tuanbia hin thazaang la hna usih ti ka duhmi cu chin miphun zong hmun kip le miphun kip sinah rian a tuanmi kan tam tuk cang. Ni fa kan nunnak ah midang cungah hmaipanh tein mi a chawnh biakmi si i zuam cio hna usih. Midang he kan i chawnh biak tikah kan i pehtlaihnak a thawngter i, kan i zumhnak zong a fehter.
Phungthlukbia 15:30, “Hmaipanh nih mi a lawmhter, thawngtha nih mi a lawmhter chinchin.” Tiah kan hmuh bantuk in nunnak kan hmuhmi chungah hin kan pawngkam ummi tete hna he biatlum le hlohthlum in chawnh biak khawh i zuam hna usih. Pathian nih nunzia kan thiamnak dingah canter ko seh. By Rev. Sang.
