India cozah nih ram innpa a si mi Myanmar ramkomh ca ah laksawng pek mi COVID-19 khamsii 1.5 million cu January 22 ah Yangon khua ah a phan cang i, hmaizarh thawk in chunh hram an thawk cang lai tiah theih a si.
Myanmar ramkomh chung ah COVID-19 khamsii a phan hmasabik hi Covidshield tiah kawh a si i, UK ram Oxford University le AstraZeneca company hna i bawm in an ser mi kha India nih a chuah mi a si.
Hi khamsii hi ni 28 dan ah voikhat chunh a si lai i, a tutan hi ramchung ah minung 750,000 an chunh hna lai tiah theih a si.
COVID khamsii chunhnak kong he pehtlai in State Counselor DASSK nih, “a voikhatnak chunh ding mi hna cu hmaisuang ah ngandamnak rian a tuan mi hna an si lai. Volunteer pawl zong an i tel lai. A dot hnihnak cu ramchung ah a biapi in a cawl mi cozah riantuan pawl an si lai. Union Hluttaw MP pawl zong an i tel lai” tiah a chim.
A dot thumnak cu stay at home hmunhma ah khua a sa mi ram mi hna ca ah a si lai i, a voihnihnak khamsii a phak tikah kum upa le zawtnak ngei cia hna ca ah a si lai tiah theih a si.
Atulio Myanmar ramkomh chung ah COVID-19 khamsii ca ah cozah nih lawmbawm a hun i, a tutiang ah 18.781 billion kyats a chuak cang tiah theih a si. Hi phaisa hin COVID-19 khamsii an cawk chap lai.
Tuluk ram zong nih Myanmar ramkomh ca ah Tuluk nih an chuah mi COVID-19 khamsii dur 300,000 laksawng kan in pek hna lai tiah January 11 ahkhan Myanmra a rak tlawng mi Tuluk ramdang vuanci nih a chim.
Source: BBC